A Conta Xeral de 2023 do Concello de Mos recolle un resultado orzamentario positivo de case 700.000 euros e un presuposto definitivo de 17M€ tras 4,5M€ de modificacións por subvencións conseguidas

–          Esta mañá aprobouse por maioría no Pleno ordinario de setembro a Conta Xeral 2023 do Concello de Mos, que inclúe a liquidación do exercizo anterior

–          Alcaldesa e concelleira de Economía e Facenda manifestáronse satisfeitas coa xestión económica responsable que se desenvolve dende a administración local mosense

O Pleno do Concello de Mos aprobou hoxe en sesión ordinaria do mes de setembro e por maioría do seus membros a conta xeral do exercizo 2023.

A devandita conta xeral inclúe, entre outros, os datos que se extraen da liquidación e que recollen un resultado orzamentario positivo en preto de 700.000 euros: 688.356,76 euros exactamente. Neste senso as representantes municipais, Nidia Arévalo, alcaldesa de Mos, e Feli Rodríguez, edil mosense de Economía e Facenda, apuntaron que “o Concello recadou máis do que gastou, os impostos directos tiveron un grao de execución do 102,20%, os indirectos tiveron unha porcentaxe de execución do 124,47% e en taxas e outros ingresos a porcentaxe de execución foi do 108,19%”. Tamén salientaron o aforro neto positivo de 840.065,70 € e o aforro bruto de 1.476.458,82 €.

Respecto do orzamento de gastos do ano 2023 a Arévalo, rexedora local mosense, destacou que “sendo un orzamento inicial de 12.933.609,18€, modificouse grazas ás subvencións conseguidas en 4,5 millóns de euros máis, dando como resultado un orzamento definitivo de 17.530.978,20€”. De entre estes gastos destacan os realizados en Investimentos: preto de 4 millóns de euros, e en Persoal: 5 millóns de euros.

Arévalo e Rodríguez Carrera tamén salientaron que se reduciu en moito a porcentaxe de endebedamento municipal, que se atopa no 23%, moi lonxe da máxima legalmente establecida que ascende a 110%. E declaráronse satisfeitas de que a liquidación do orzamento municipal 2023 recolla datos positivos no resultado orzamentario e no aforro, tanto bruto coma neto, “demostrando unha xestión responsable e con orzamentos realistas, sen inflar os ingresos; o que revirte en resultados positivos coma os logrados na Liquidación do ano pasado”, dixeron.

Ademais, Mos non figura no listado de entidades locais incluídas no Procedemento de pago a Proveedores 2024 do Ministerio de Facenda, nin en adhesión voluntaria, nin obrigatoria.

Por último anunciáronse medidas para reducir ao máximo o remanente de Tesourería negativo, como medidas de contención de gasto, planificación e control, e seguemento e fiscalización.