A Deputación abre a inscrición para o webinario sobre o Plan de Recuperación do Sector Turístico

Compartir

A sesión será o 8 de setembro e contará con persoas expertas en turismo de todo o estado que informarán das claves das liñas de axuda dos fondos europeos

 

As empresas do sector turístico da provincia poden xa inscribirse no webinario “Plan de Recuperación do Sector Turístico: Oportunidades para o Sector Público e o Sector Privado”, o encontro telemático de alto nivel organizado pola Deputación de Pontevedra para informar das distintas liñas de axuda ás que poderán concorrer a través dos fondos Next Generation.

 

Esta acción da Deputación busca achegar a información ao sector da provincia, conformado maioritariamente por  pemes e persoas autónomas, co fin de que dispoñan de coñecemento claro e detallado dos programas e do financiamento previstos no Plan de Recuperación Estatal e, en concreto, no Plan de Recuperación e Competitividade Turística. A institución provincial abriu o prazo de inscrición polo que todas as persoas que estean interesadas en participar poden xa inscribirse con só encher un formulario no sitio web de Turismo Rías Baixas https://turismoriasbaixas.com/gl/plan-de-recuperacion-del-sector-turistico

 

A xornada, que se realizará o mércores 8 de setembro vía Zoom, centrarase en facilitar as claves dos programas, en especial as axudas ás que poderán optar para abordar melloras no ámbito do comercio en zonas turísticas, da economía circular, melloras en equipos (eficiencia enerxética), dixitalización ou sustentabilidade nos seus establecementos. Por elo se está a convocar a adegas, axencias de viaxes, aloxamentos, turismo activo, comercio… en definitiva, toda a cadea de valor do turismo que pode participar nesta xornada destinada a achegar o detalle do Plan aos seus beneficiarios.

 

Ademais, a información tamén está destinada ás asociacións que conformar o sector turístico en Pontevedra e en Galicia e que tamén poderán optar a liñas de axudas para entidades como é o caso das  Convocatorias de “última milla” de proxectos innovadores dirixidas a empresas, preferentemente PEMES, e asociacións ou entidades asociativas previstas cun orzamento de contorna a 80 millóns de euros.  Por todo elo, a Deputación reúne a un panel de  relatores e relatoras de alto nivel formado por persoas expertas e dos equipos de dirección do Ministerio de Industria, Comercio e Turismo, da sociedade RED.ES e de  SEGITTUR.

 

A xornada do día 8 comezará ás 9.30 horas coa presencia de Galo Gutiérrez, director xeral de Industria e da Pequena e Mediana Empresa do Ministerio de Industria, Comercio e Turismo, quen dará unha charla titulada “Os retos da pequena e mediana empresa na recuperación: oportunidades”. A continuación Luis Prieto, director de economía dixital de Red.es, falará sobre as “Axudas enmarcadas nos compoñentes 13 e 16. Impulso ás PEMES” e tras el Enrique Martínez, presidente de Segittur, centrarase nas “Axudas enmarcadas no compoñente 14. Apoio ao sector turístico”. A seguinte quenda de palabra será para Ana Jar Rodríguez-Medel, subdirectora adxunta de Desenvolvemento e Sostibilidade Turística do Ministerio de Industria, Comercio e Turismo, quen falará sobre “Estratexia de sostibilidade turística en destinos”. A derradeira das charlas correrá da man de John Mora, vicepresidente da Comisión de Smart Cities e Turismo Intelixente de Ametic, quen porá sobre a mesa “As necesidades de transformación do sector turístico. Tecnoloxías aplicadas ao turismo”.