A Deputación renderá homenaxe ao deporte da Provincia cunha gala no Castelo de Soutomaior

Compartir
Carmela Silva. Fonte: Deputación

No evento do próximo xoves farase entrega das bolsas da marca Provincial de alto nivel “DepoDan” e “DepoPromesa” para 181 deportistas.

Os xardíns do Castelo de Soutomaior serán o escenario o próximo xoves, ás 19.00 horas, da Gala do Deporte provincial, organizada pola Deputación de Pontevedra, na que se entregarán as bolsas DepoDan e DepoPromesa a 181 deportistas que teñen a marca Provincial.

No evento, que será conducido polo xornalista Terio Carrera e a capitana do Atlético Guardés de balonmán feminino, Lorena Pérez, se fará un recoñecemento especial ás olímpicas, olímpicos, paralímpicas e paralímpicos que deixaron tan alto o nome da provincia nos Xogos de Tokio, así como a todas as e os deportistas de alto nivel e “promesas” que tantos éxitos acadan ano tras ano convertendo á provincia en todo un referente no mundo do deporte. A Gala arrancará cunha homenaxe a Fran Teixera, histórico adestrador de balonmán e traballador da Deputación, falecido recentemente, e contará coa actuación de Carlota Crey, música que forma parte do directorio de “Descubreas”, a iniciativa provincial coa que se reivindica o papel das mulleres no sector.

A Presidenta da Deputación amosou o seu orgullo “polo nivelazo do noso deporte e lembrou que é o terceiro ano que a Deputación de concede as bolsas DepoDan e DepoPromesa “que permite ás e aos deportistas adestrar e preparar os seus obxectivos e tamén que poidan participar en competicións nacionais e internacionais”. Do total das bolsas concedidas 137 serán para deportistas de alto nivel, que recibirán 174.300 euros, e as 44 restantes para deportistas promesa, que contarán con 24.700 euros.

Carmela Silva lembrou que o proxecto estaba dotado con 250.000 euros e como “moitas e moitos deportistas non puideron solicitar as súas bolsas, porque estaban en grupos burbulla antes das olimpíadas ou mesmo xa en Tokio, imos a sacar unha segunda convocatoria para cubrir todo o orzamento e que ninguén se quede sen bolsas”