A DGT comeza mañá unha campaña especial de control de consumo de alcol e drogas entre os condutores en Galicia

A campaña durará ata o próximo domingo, día 25 de agosto, con especial incidencia nas zonas de maior afluencia turística

– Na mesma campaña do ano pasado, 538 condutores foron sancionados por consumo de alcol e 244, por consumo de drogas
– A Delegación do Goberno e a DGT advirten sobre a combinación entre consumo de alcol e exceso de velocidade nas estradas galegas
– O ano pasado dos 862 condutores falecidos en accidente de tráfico en España, 462 resultaron positivos en alcol e drogas

A Delegación do Goberno en Galicia informa de que mañá, luns, comezará unha Campaña Especial de Tráfico co obxectivo de diminuír o consumo de alcol e drogas ao volante. Ata o próximo domingo, 25 de agosto, os axentes da Agrupación de Tráfico da Garda Civil intensificarán os controis de alcoholemia e presenza de drogas nas estradas de Galicia. Nesta iniciativa a DGT fomenta ademais a colaboración cos concellos das catro provincias para realizar probas en zonas urbanas, con especial incidencia nas zonas de maior afluencia turística e de festas populares.

O alcol está presente como factor concorrente ou causante nun terzo dos accidentes mortais. A súa presenza na condución, dependendo da súa taxa, multiplica entre 2 e 15 o risco de sufrir un accidente. A única taxa segura é 0,0%. Non só está relacionado cunha maior accidentalidade, senón que tamén repercute nunha maior mortalidade, ao ser un factor vinculado cun peor prognóstico nas lesións sufridas.

Segundo os datos do Instituto Nacional de Toxicoloxía referidos ao ano pasado a nivel nacional, dos 862 condutores falecidos en 2023 en accidente de tráfico e sometidos a autopsia e análise toxicolóxico, un total de 462 condutores (o 53,6%) deron positivo nos resultados toxicolóxicos de alcol, drogas de abuso e/o psicofármacos, illadamente ou en combinación. Nestes resultados, o alcol segue sendo a substancia máis detectada nos condutores falecidos, cun 32,7%, seguido da cocaína e o cannabis, e en terceiro lugar, os psicofármacos.

Resultados da campaña do ano pasado en Galicia

Na mesma campaña especial desenvolvida o ano pasado entre o 14 e o 20 de agosto, a Garda Civil realizou 35.961 controis de alcoholemia en Galicia, dos que 538 foron positivos. Tamén efectuou 492 controles de drogas, con 244 positivos.

Ademais, a 26 condutores instruíronselles dilixencias para o seu posterior traslado á autoridade xudicial por delitos contra a seguridade viaria.