A portavoz do PSOE no Congreso anima a apostar con Besteiro polo cambio na Xunta de Galicia despois de anos de inacción do PP

A portavoz do PSOE no Congreso, Esther Peña, manifestou en Nigrán o seu convencemento de que Galicia apostará polo cambio nas eleccións autonómicas do 18F e apoiará a José Ramón Gómez Besteiro “despois de anos de desidia e inacción do Partido Popular, que leva tempo mostrando, agora con Rueda, o seu esgotamento e debilidade, incapaz

de enfrontar os retos que ten a autonomía”. Peña, acompañada polo seu compañeiro no Grupo socialista no Congreso e Secretario Xeral do PSdeG-PSOE, David Regades, e pola candidatura socialista, coñeceu en profundidade as inquedanzas da militancia do Val Miñor con quen mantivo un encontro no que tamén participaron os alcaldes de Nigrán e Gondomar, Juan González e Francisco Ferreira, e o responsable do PSOE en Baiona, Carlos Gómez.

David Regades informou a Esther Peña da posta en marcha dos proxectos na provincia de Pontevedra, investimentos liderados polo Goberno de España “fronte a unha Xunta do PP inexistente e que castiga permanentemente a esta provincia”. O Secretario Xeral fixo un repaso ás infraestruturas que dependen do goberno central, que segue a dar pasos sostidos para cubrir os grandes eixos de comunicación como solucionar a paralización do PP da variante de Cerdedo, o avance continuo da conexión ferroviaria Sur, as melloras do Eixo Atlántico ou as peaxes da AP9 que cos actuais orzamentos de 2024 terán unha bonificación de ata o 75%. “Cuestións todas elas, subliñou Regades, que permiten o

desenvolvemento socioeconómico da provincia, así como os fondos europeos que nos concellos da provincia de Pontevedra só chegan grazas ao impulso do Estado xa que a Xunta só reparte os fondos que xestiona con criterios partidistas”.