A Praza do Teucro converterase nun espazo de fantasía coa ambientación dun Conto de Nadal de Pontevedra protagonizado polo comercio local

A iniciativa de Promoción Económica, á que xa se adheriron 55 negocios, convida a tódalas firmas que queiran ‘saír’ na historia a visibilizar os seus produtos cun relato de fábula.

O Conto será ‘narrado’ entre o 17 de decembro e o 6 de xaneiro cunha ambientación de Nadal única. A campaña inclúe unha guía audiolibro, contacontos e sorteos de vales de 25 euros.

A Praza do Teucro converterase entre os días 17 de decembro e 6 de xaneiro nun espazo de fantasía cunha ambientación única no que se ‘narrará’ o Conto de Nadal de Pontevedra, unha historia protagonizada polos comercios locais da cidade e creada para darlles visibilidade e incentivar as compras neles nestas datas tan significativas. A iniciativa impulsada pola Concellería de Promoción Económica e Turismo en colaboración coa firma Sra. Nona Brand, á que xa se adheriron 55 negocios pontevedreses, convida a tódolos comercios que queiran ‘saír’ no conto a inscribirse, plantexando un relato de fábula no que aparecerán os nomes dos distintos establecementos participantes cun produto ou servizo que desexen destacar.

“Aínda lle faltaba un agasallo para a súa irmá e precisaba que fora algo especial, así que se achegou a Lanas Tobío e alí atopou xusto o que estaba a buscar: un xersei feito a man cunha cor fermosa que lle daría calorciño nas frías tardes de inverno”. Con esta narrativa exemplifica a concelleira de Promoción Económica, Yoya Blanco, o espírito desta iniciativa de dinamización que, ademais de visibilizar e poñer en valor aos comercios de proximidade mediante un conto único, tamén lles fará entrega “dunha chequeira con participacións para distribuír entre os clientes que efectúen as súas compras de Nadal nos negocios adheridos durante o período de campaña, (do 17 de decembro ao 6 de Xaneiro): os clientes só deberán enchelas cos seus datos persoais e introducilas nun buzón que estará habilitado para este fin na Praza do Teucro”.

“Entre tódolos participantes sortearanse dez cheques regalo por valor de 25 euros cada un para trocar por produtos e servizos en calquera dos establecementos comerciais adheridos. O sorteo terá lugar na Casa da Luz o día 7 de xaneiro e os gañadores serán notificados por vía telefónica”, explica Yoya Blanco.

Aínda que a historia estará exposta durante toda a campaña, aquelas persoas que se acheguen ata a Praza do Teucro para visitar a mostra do Conto de Nadal de Pontevedra terán as opcións de lela ou escoitala, ao dispoñerse dunha guía audiolibro cun código QR que, ao escanearse, reproducirá a historia en audio. Ademais, haberá seis días nos que se celebrarán sesións de Contacontos a cargo da empresa ‘Onde viven os contos’ para que os máis pequenos poidan vivilo e desfrutalo como se dun espectáculo se tratase:

Sábado 18 de decembro: 17:30 horas.
Domingo 19 de decembro: 17:30 horas.
Xoves 23 de decembro: 17:30 horas.
Domingo 26 de decembro: 17:30 horas.
Venres 31 de decembro: 12:30 horas.
Martes 4 de decembro: 17:30 horas.

Yoya Blanco subliña “o éxito das visitas informativas que durante os pasados días realizaron polos comercios da cidade as responsables de Sra. Nona Brand, xa que, a falta de dous días para que se peche o prazo de inscrición, lograron animar a moitos comerciantes, acadando a implicación de máis de medio centenar de negocios”. Non obstante, a edil socialista lembra que “todos aqueles que desexen formar parte deste Conto de Nadal e aínda non se inscribiran, están a tempo de facelo remitindo á Concellería de Promoción Económica e Turismo o nome do seu comercio e dun produto a destacar a través dunha das seguintes canles de contacto: o email info@contodenadal.com ou o teléfono/whatsapp 638 168 744”.

A firma Sra. Nona Brand levará a cabo a creación e deseño do conto entre os días 1 e 10 de decembro, estando previsto o inicio dos traballos de ambientación e montaxe na Praza do Teucro para a semana do 13 de decembro, de xeito que se poida inaugurar o 17 de decembro, coincidindo co inicio da campaña.

Toda a información sobre a campaña poderá atoparse na web do Concello de Pontevedra a través do enlace www.pontevedra.gal/contodenadal.