A XUNTA AVANZA NA COLABORACIÓN CO CONCELLO DE PONTEAREAS PARA IMPULSAR A NOVA PRAZA DE ABASTOS DO MUNICIPIO, CUNHA ACHEGA AUTONÓMICA DE 800.000 €

O conselleiro de Emprego, Comercio e Emigración, José González, reuniuse coa alcaldesa de Ponteareas, Nava Castro

A actuación enmárcase na aposta estratéxica da Xunta para reforzar e revitalizar os mercados e prazas de abastos e o seu impulso como Mercados Excelentes

O conselleiro de Emprego, Comercio e Emigración, José González, acompañado do director xeral de Comercio e Consumo, Gabriel Alén, mantivo hoxe un encontro coa alcaldesa de Ponteareas, Nava Castro, e co concelleiro de Comercio do municipio, Ricardo González, co gallo de avanzar na colaboración entre a Xunta e este concello pontevedrés para a posta en marcha da nova praza de abastos. Neste senso, o Executivo galego ten consinados 800.000 euros nos orzamentos do vindeiro ano para as obras de rehabilitación deste novo espazo, que albergará o mercado municipal e ofrecerá novas opcións gastronómicas e de restauración.

A actuación enmárcase na aposta estratéxica da Xunta para reforzar e revitalizar os mercados e prazas de abastos —máis dun cento en toda Galicia—
como o mellor escaparate do produto galego de calidade, cun gran vencello á contorna na que se integran, así como polo seu rol dinamizador na vitalidade e vertebración do territorio, fonte de emprego e riqueza.

Precisamente entre as áreas nas que está a traballar o Executivo galego de cara ao futuro Plan Estratéxico de Comercio 2025-2030 —que actualmente está en fase de elaboración para recibir as achegas de todos os axentes implicados — figura a mellora e impulso deste espazos e a súa certificación co selo de Mercados excelentes, potenciando non só a súa actividade comercial, senón tamén o incremento do seu atractivo e interese turístico.