A Xunta recibiu xa 23 solicitudes de axudas para a reconstrución das vivendas afectadas polos incendios

Anuncios

A conselleIra de Vivenda e Planificación de Infraestruturas, María M. Allegue, reuniuse hoxe con veciños afectados nos concellos da Pobra de Trives e Larouco

• Ata o momento, ademais das 23 peticións de axudas, 78 persoas solicitaron información sobre estas achegas autonómicas.

• Allegue subliñou ante os afectados o compromiso da Xunta para resolver as solicitudes “coa máxima celeridade”, a fin de que poidan iniciar canto antes as reconstrucións dos fogares

• A conselleira lembrou que as achegas activadas polo Goberno galego poden acadar case 150.000€ no caso de vivendas habituais

• Recordou que o Goberno galego tamén asumirá o 100% do alugueiro temporal, se é preciso e achegará ata 600€ máis para sufragar gastos derivados desta situación

A Xunta recibiu ata agora 23 solicitudes de axudas para a reconstrución das vivendas afectadas polos incendios. A conselleira de Vivenda e Planificación de Infraestruturas, María Martínez Allegue, deu conta destas peticións na visita que realizou hoxe aos concellos ourensáns da Pobra de Trives e Larouco, onde se reuniu con veciños cuxos fogares se viron danados polos lumes e cos alcaldes.

Nestes concellos, a conselleira puido coñecer a situación de propietarios afectados e comprobar os danos nas súas casas. Allegue explicoulles aos veciños as liñas das axudas activadas pola Xunta e insistiu no compromiso do Goberno galego para axilizar “coa máxima celeridade” a súa tramitación, a fin de que canto antes “as familias poidan comenzar a recuperación destes fogares tras esta terrible vaga de lumes”.

Ata o momento, ademais das 23 peticións de axudas, 78 persoas solicitaron información sobre estas achegas autonómicas.

Allegue recordou que as achegas da Xunta poden acadar case 150.000€ no caso de vivendas habituais, xa que ao 132.000 euros para rehabilitación do inmoble poden engadirse 16.200 euros polo enxoval doméstico. En caso de segunda residencia, as achegas son de ata 66.000€ e 5.400€ para o enxoval.

Esta axuda pode servir tanto para rehabilitar o inmoble, como para adquirir un novo, no caso de que quedase en situación de ruína como consecuencia dos lumes. A acreditación do estado de ruína se realizará mediante un informe técnico que, se o propietario desexa, elaborará a Xunta. Nestes casos hai que sumar ademais axudas complementarias para o realoxo mentres se rehabilitan as vivendas danadas.

Ademais, o Goberno galego tamén asumirá o 100% do alugueiro temporal, se é preciso e achegará ata 600€ máis para sufragar gastos de aloxamento provisional, transporte ou mudanza.

Os afectados poderán así mesmo percibir a contía total da axuda de xeito anticipado, o que lles permitirá axilizar obras de rehabilitación das vivendas. Todos os damnificados teñen a súa disposición o teléfono 012 e o persoal do IGVS, e tamén nas 16 oficinas despregadas nas zonas afectadas poden resolver todas as súas dúbidas.