A Xunta reitera a necesidade de que Galicia conte cun mapa aeroporturario coordinado e competitivo

• O conselleiro de Presidencia, Xustiza e Deportes, Diego Calvo, participou na reunión do Comité de Coordinación Aeroportuaria de Galicia onde apelou a unha coordinación efectiva e eficiente entre os concellos e AENA
• Lembra que o Goberno galego está a facer unha aposta para atraer viaxeiros no marco do seu plan de promoción dentro da Estratexia de Turismo de Galicia 2030
• Solicita a AENA reflexionar sobre o incremento de prezos que afecta ás viaxes en avión desde Galicia e sinala que non se recuperaron as frecuencias desde os tres aeroportos galegos a niveis precovid
• A Xunta amosou a colaboración para reforzar o transporte interurbano con A Coruña e Vigo nas cinco semanas que o aeroporto de Santiago vai estar pechado polas obras na pista de aterraxe e unha vez se coñezan os horarios dos voos nese período

O conselleiro de Presidencia, Xustiza e Deportes, Diego Calvo, participou esta tarde xunto coa directora de Mobilidade Judit Fontela, e o director de Turismo de Galicia, Xosé Merelles, na reunión do Comité de Coordinación Aeroportuaria de Galicia, no aeroporto Rosalía de Castro de Santiago de Compostela, onde reiterou a necesidade de que a comunidade galega conte un mapa de rutas coordinado e consensuado entre todas as partes implicadas para garantir así a competitividade dos aeroportos galegos. Para a Xunta de Galicia, a solución non pasa porque o Goberno galego financie voos, senón pola coordinación de forma conxunta e a planificación eficiente de rutas.

Ademais, salientou que a Xunta está a desenvolver o plan de promoción turística, no que inviste máis de 13 millóns de euros, para incentivar o destino galego e atraer máis visitantes á comunidade. Precisamente, este documento estratéxico de Turismo de Galicia prevé promocionar os tres aeroportos galegos en feiras, encontros e outras accións de promoción que leve a cabo durante este 2025.

A Xunta confía seguir así atraendo a máis turistas a Galicia e lembrou que o pasado ano o destino galego recibiu a visita de 8,2 millóns de turistas, dos cales o 30% era de orixe estranxeira, acadando así máximos históricos.

Ao número de turistas que se aloxaron en Galicia hai que sumar os case medio millón de peregrinos que fixeron o Camiño de Santiago. Precisamente, o 58% procedían do estranxeiro, case tres puntos máis que en 2023. Neste sentido recordaron que a solución non pasa por que a Xunta de Galicia financie voos, senón pola coordinación de forma conxunta e a planificación de rutas.

Diego Calvo amosou tamén a preocupación da Xunta sobre a falta de recuperación das frecuencias dos voos desde os tres aeroportos galegos, sobre todo a destinos nacionais, a niveis de antes da pandemia da covid. Ademais, solicita a AENA que faga unha reflexión ante o incremento de prezos que dificulta o acceso ás viaxes en avión á cidadanía galega.

No encontro de hoxe tamén se abordaron as obras da pista de aterraxe do aeroporto de Santiago de Compostela que obrigarán ao peche da terminal durante cinco semanas, asunto no que o conselleiro de Presidencia trasladou a disposición da Xunta para organizar e reforzar as liñas de transporte interurbano de autobús coas cidades da Coruña e Vigo unha vez se coñezan os voos que se van implantar nesas urbes durante esas semanas de peche do aeródromo compostelán.

Por outra parte, na reunión informouse do proxecto de torre de control dixital do aeroporto de Vigo, do que a Xunta advirte que se teña en conta o posible prexuízo aos controladores e ao propio funcionamento da terminal viguesa.