ALFONSO VILLARES SITÚA AO GRUPO PEREIRA COMO EXEMPLO DE VANGARDA NO DESENVOLVEMENTO TECNOLÓXICO DA FROTA PESQUEIRA GALEGA

Acompañado dos tamén conselleiros Román Rodríguez e Fabiola García, asiste á botadura do Argos Berbés

– Pon valor o potencial da industria marítimo-pesqueira, que contribúe ao desenvolvemento socioeconómico da comunidade e está considerada como un referente no marco da UE en termos de xeración de emprego, de competitividade empresarial e de abastecemento alimentario

– O arrastreiro conxelador, construído tras un investimento de 30M€, partirá rumbo ás Malvinas a comezos de ano, onde traballará no caladoiro das Illas Falklands e se dedicará á captura de lura

– Cun rexistro bruto de 2.499 toneladas, 85 metros de eslora e 14 de manga é o segundo buque máis grande construído ata a data por dita armadora

O conselleiro do Mar, Alfonso Villares, sitúa ao Grupo Pereira como exemplo de vangarda no desenvolvemento tecnolóxico da frota pesqueira galega. Acompañado dos tamén conselleiros de Educación, Ciencia, Universidades e FP, e de Política Social, Román Rodríguez e Fabiola García, respectivamente, asistiu á botadura do Argos Berbés, construído por encargo da sociedade mixta participada pola armadora pontevedresa, tras un investimento de 30 millóns de euros.

Para Villares o novo buque é unha clara mostra do potencial da industria marítimo-pesqueira, que contribúe ao desenvolvemento socioeconómico da comunidade e está considerada como un referente no marco da Unión Europea en termos de xeración de emprego, de competitividade empresarial e de abastecemento alimentario.

O arrastreiro conxelador leva a denominación do barrio no que medrou dito grupo empresarial. Partirá rumbo ás augas Malvinas a comezos de ano logo da renovación das licenzas de pesca por 25 anos, o que aporta a seguridade xurídica que se precisa para seguir na senda empresarial da renovación da frota. Traballará no caladoiro sostible das Illas Falklands e dedicarase á captura de lura; especie da que, na última década, en Galicia se descargou unha media de 70.000 toneladas.

Características do Argos Berbés