Avanza a execución do centro integral de saúde de lalín, cos traballos de cimentación xa finalizados

A Xunta avanza nas obras de construción do Centro Integral de Saúde (CIS) de Lalín, finalizando xa a fase de cimentación.

As actuacións, que comezaron en maio, seguen progresando a bo ritmo, cunha execución incluso adiantada con respecto á programación inicialmente establecida, tal como puido constatar a conselleira de Infraestruturas e Mobilidade, Ethel Vázquez, na visita que realizou ás obras a semana pasada, xunto co alcalde de Lalín, José Crespo.

Os traballos de cimentación quedaron rematados nos brazos que conforman a estrutura das novas instalacións sanitarias, rematando esta mesma semana a cimentación no brazo que restaba, o máis próximo ao acceso.
A execución dos muros de forxado sanitario tamén está xa acabada nun dos brazos e van comezar os traballos de encofrado do forxado de lousa do andar baixo. No brazo central xa están comezando a executarse os muros de peche do forxado sanitario.

A intervención, cun investimento autonómico de 9 millóns de euros, ten como obxectivo ofrecer aos veciños da comarca de Deza un equipamento sanitario de vangarda a finais do ano 2022.
O Centro Integral de Saúde de Lalín é o segundo destas novas instalacións sanitarias de referencia que se constrúe en Galicia, logo do que a Xunta está a executar na cidade de Lugo, e aos que pronto se sumará o CIS Olimpia Valencia de Vigo, actualmente en fase de redacción do proxecto. O edificio está situado nunha parcela de máis de 15.000 m² do Alto de Vales e contará con boas comunicacións, pola proximidade da estrada N-525. O CIS disporá dunha superficie de 5.500 m² na que se integrarán un Centro de Saúde e un Punto de Atención Continuada.

Nas súas instalacións haberá área asistencial, área pediátrica, especialidades médicas e unidades complementarias, como hospitalización a domicilio, saúde mental, hemodiálise ou atención á muller.

O obxectivo da Xunta é ofrecer servizos sanitarios de primeiro nivel aos veciños de Lalín, Agolada, Rodeiro e Dozón, ademais de prestar certas asistencias aos veciños de Silleda e Vila de Cruces, beneficiando a máis de 35.000 persoas.
O Centro Integral de Saúde de Lalín e comarca de Deza é unha actuación financiada pola Unión Europea, no marco do Programa Operativo FEDER Galicia 2014-2020, como parte da resposta da UE á pandemia da covid-19.