Benestar Social impulsa o I Campionato de Cartas “Cidade de Pontevedra” no marco da programación de actividades para maiores

Anuncios

Desenvolverase ao longo do vindeiro mes nunha vintena de centros sociais do municipio e o Pazo da Cultura acollerá a gran final a fin de semana do 26 e 27 de outubro

Os participantes poderán elixir entre seis modalidades de xogos: tres por parella (tute, brisca e escoba) e tres individuais (chinchón, cinquiño e sete e media)

Atención, memoria, estratexia, interpretación da linguaxe non verbal, astucia… son destrezas que terán que ter as/os participantes no I Campionato de Cartas “Cidade de Pontevedra” que impulsa a Concellería de Benestar Social, dirixida por Anabel Gulías, no marco da programación de maiores para o último trimestre do ano.

As fases eliminatorias – unha por centro e seis zonais- desenvolveranse ao longo do mes de outubro nunha vintena de centros sociais do municipio: 15 do rural (1 por parroquia) e 6 no casco urbano.

O Pazo da Cultura acollerá a Gran Final a fin de semana do 26 e 27 de outubro. Os participantes terán que ser maiores de 60 anos e poderán medir a súa habilidade e fortuna en xogos tradicionais. Poderán elixir entre tres modalidades de xogos por parella: tute, brisca e escoba, e outros tantos xogos individuais: chinchón, cinquiño e sete e media.

As inscricións están abertas, en principio, ata o vindeiro luns 23 de setembro e pódense formalizar de maneira presencial nos propios centros sociais. (Máis info no enderezo electrónico campionatodecartas.pontevedra@gmail.com )

Co lema “Non o penses máis…canta as corenta!”, desde a Concellería de Benestar Social anímase á participación neste novidoso campionato que se incorpora á oferta de actividades a prol do envellecemento activo e a dinamización social das parroquias e barrios que impulsa o departamento municipal.

O programa de actividades de maiores da Concellería de Benestar Social ten percorrido por diante antes de que remate o ano, conxugando actividades de éxito acreditado como os obradoiros de memoria e os de estimulacion cognitiva e prevención do Alzheimer con outras novas: é o caso do campionato de cartas, un obradoiro de recuperación da tradición oral e unha proposta en fase de definición.

En Pontevedra viven 24.598 persoas maiores de 60 anos -14.689 mulleres e 9.909 homes-, unha cifra que supón case o 30% do censo municipal.