BNG demanda ao executivo estatal explicacións, ante as identificacións inxustificadas, no Concello de Mos por parte da Garda Civil

Compartir
Nestor Rego. Fonte: BNG

Néstor Rego exixe depurar responsabilidades, e estabelecer as sancións que correspondan ante esta situación contraria á legalidade vixente, e que vulnera as liberdades e dereitos civís

 

O Bloque Nacionalista Galego, reclama explicacións ao Goberno do Estado polas identificacións inxustificadas e sen amparo legal que a Garda Civil realizou a persoas que asistían como espectadoras, na localidade de Mos, á Volta Ciclista.

Na penúltima etapa da Volta Ciclista, entre Sanxenxo e Castro de Herville, (Mos), a Garda Civil identificou a varias persoas vinculadas a diversos colectivos de protección do medio ambiente, e comunidades de montes que presenciaban o evento. Estas persoas mantiveron en todo momento unha actitude pacífica, sen interferir no transcurso do acto deportivo e sen alterar o orde público.

Cando os axentes da Garda Civil comezaron a identificalas, as persoas interpeladas preguntaron, tal e como teñen dereito, o motivo da actuación e pediron que se lles informara sobre as razón que tiñan para proceder a identificalos. Mais os axentes limitáronse a dar como resposta un “porque si”, sen chegar a aclarar as razóns en que se amparaban para realizar esa actuación.

“Debe lembrarse que a Lei de protección da seguridade cidadá recolle de maneira expresa o dereito da persoa á que se solicite que se identifique, de ser informada de modo inmediato e comprensíble das razóns de dita solicitude” ,explica o Deputado Nacionalista.

Neste sentido, Néstor Rego reclama ao Ministerio de Interior que se investiguen os feitos e se proceda a depurar responsabilidades, así como estabelecer as sanción que correspondan ante a mala praxe dos axentes, contraria á legalidade vixente. “Este tipo de actuacións vulnera as liberdades e dereitos civís dos cidadáns e cidadás” destaca Rego.

A actuación da Garda Civil resulta “claramente abusiva e non se ampara na legalidade vixente”, e non existía tampouco xustificación para a actuación, e “os axentes non cumpriron co deber de información que se lles exixe”.

Paralelamente, a formación nacionalista tamén quere coñecer se se deron instrucións para realizar estas identificacións e, de ser así, “cales son os motivos e razóns que as xustifican”. “A práctica de identificacións en vía pública precisa da existencia de indicios fundados para realizala e non un simple porque si.

O Goberno do Estado ten que actuar na identificación inxustificada da localidade de Mos” salienta Rego. Os axentes, para o deputado nacionalista, non cumpriron co seu deber de dar a coñecer o motivo polo que se requiría a identificación das persoas.