BUEU CONVOCA UNHA REUNIÓN COAS ASOCIACIÓNS DA VILA PARA PRESENTAR AS AXUDAS DA FESTA DAS ALFOMBRAS

O Concello de Bueu convocará unha reunión coas asociacións da vila para presentar a liña de axudas que se creará para a elaboración de alfombras de cara á Festa das Alfombras Florais do Corpus. Carmen García, concelleira de cultura, asistirá a esta xuntanza que terá lugar o luns 18 de marzo, ás 20.00 horas, no salón de plenos da Casa Consistorial, e na que tamén estarán alfombristas da vila.

O acto, ao que poderán asistir as persoas representantes de colectivos, servirá para explicar as iniciativas do goberno local de cara a ampliar a participación da veciñanza e do tecido asociativo e social na festa, que este ano se celebrará o 2 de xuño. A principal é a creación dunhas axudas para fomentar a elaboración de tapices florais co fin de reforzar a ambientación das rúas e revitalizar esta tradición cunha historia que se remonta ao século XVII. Estas axudas de participación, para as que se destina un crédito de 9.000 €, dividiranse en dúas liñas: 4.500 € repartiranse en contías económicas por participar e elaborar alfombras de tamaños 3 x 5 metros, 3 x 10 metros e 3 x 15 metros.

A outra parte, do mesmo importe, destinarase a bonos comercio que se entregarán ás persoas participantes e coas que se reforzará o comercio de proximidade.

Os premios por participación estarán dirixidos a aquelas persoas ou colectivos que realicen as alfombras dentro do percorrido marcado para a festividade de 1,4 quilómetros, e que abrangue as rúas de Pazos Fontenla, Eduardo Vincenti, Montero Ríos, e Francisco Escáneo.