Carmela Silva pon en valor a traxectoria da Escola de Xoiería Atlántico de Vigo

Compartir

Carmela Silva salienta a traxectoria, a responsabilidade social e a formación da Escola de Xoiería Atlántico de Vigo

A presidenta da Deputación mantivo un encontro con seis mozas latinoamericanas que participan no programa Becas Atlántico do centro e cos estudantes que viaxarán para realizar prácticas en Francia e Portugal co programa provincial Practicum Depo

 

“O equipo desta escola dá leccións de vida”. A presidenta da Deputación de Pontevedra, Carmela Silva, puxo hoxe en valor a traxectoria da Escola de Xoiería Atlántico de Vigo na visita que realizou a este centro de formación, na que mantivo un encontro con seis mozas de Latinoamérica que van participar no programa de becas da Escola, “Becas Atlántico”, así como con catro dos cinco estudantes que a partir de outubro viaxarán a Francia e Portugal no marco do programa de mobilidade Practicum Depo da institución provincial.

 

Esta escola artística viguesa, que imparte o ciclo de Grao Medio de Procedementos en Xoiaría Artística, é a única de Galicia e unha das poucas do Estado que ofrece unha formación completa na especialidade de xoiaría, que fai que boa parte do seu alumnado acceda moi cedo á empregabilidade. As e os estudantes tamén poden cursar o título da Universidade de Barcelona en Xemoloxía, Diamante ou Síntese, de xeito que poden incorporarse ao mercado laboral por estas dúas titulacións. Neste curso, o centro conta con 70 alumnas e alumnos de 11 nacionalidades e varios deles están a participar no programa de prácticas Practicum Depo da Deputación, con acceso a empresas de xoiaría de todo o espazo europeo. Precisamente, a empregabilidade acadada a través deste programa e tamén das Becas Tous, que lles abre a posibilidade de traballar logo nos talleres da empresa tralo período de formación, é un dos feitos que máis destacaron tanto Carmela Silva como o equipo docente do centro, dirixido por Carlos Pereira.

A presidenta provincial quixo recoñecer máis polo miúdo a aposta da Escola pola formación regrada en xoiería para mulleres de países latinoamericanos a través das Becas Atlántico, polas que estas mozas acceden ao Ciclo Medio en Procedementos en Xoiería Artística que imparte o centro e logo teñen tamén a posibilidade de optar ás prácticas en empresas e ao programa internacional Practicum  Depo. Este 2021 son seis as mulleres que participan no programa, procedentes de Chile, Panamá, Honduras e O Salvador. “Non coñezo proxecto máis fermoso que o voso. Esta Escola practica a formación desde unha idea humanista, sempre camiñan cara adiante e con optimismo malia as dificultades”, subliñou Carmela Silva, que apuntou que “temos unha débeda histórica con estas mulleres e por iso quixen coñecelas en primeira persoa”.  “Eu son feminista e que sexan mulleres as que participan maioritariamente nestes proxectos satisfaime, porque temos que construír un mundo onde as mulleres poidan cumprir os seus soños. As mulleres somos moi potentes e valentes, nada nos frea. Temos que facer cousas xuntas porque o voso discurso, que ás veces nos falta no mundo que chaman desenvolvido, é moi potente”. Carmela Silva agregou que “a xoiaría é unha actividade humana con moita tradición e posibilidades” e, máis concretamente destacou o feito de que América Latina “é unha zona marabillosa onde a xoiería identifica ao seu pobo”. “Este proxecto humanista –deixou escrito a presidenta no libro de honor do centro- permite que as mulleres poidan construír unha vida ligada á xoiería, pero tamén comunidade nos seus propios países”.

Traballo tralas estadías

A presidenta provincial mantivo un encontro con catro dos cinco estudantes que en outubro viaxarán a Portugal e Francia no marco do proxecto Practicum Depo para realizar prácticas en empresas e institucións. Desde o ano 2015, son xa 21 as persoas vinculadas á Escola que teñen participado neste programa e, como destacou o director, Carlos Pereira, “moitos dos alumnos e alumnas que participaron no Practicum Depo quedaron a traballar nas empresas nas que fixeron as estadías”. No caso do alumnado que irá a Francia, farán prácticas na empresa Orest Group de Estrasburgo, coa que a Escola Atlántico ten asinado un acordo para que estes estudantes acaben as súas prácticas cun contrato de traballo, e o que fará a súa estadía en Portugal terá tamén a posibilidade de comezar a súa carreira profesional no país veciño. “Cremos que viaxar é moi importante para expandir os seus coñecementos e atopar novas oportunidades, pero tamén para que despois poidan regresar e crear riqueza aquí”, agregou Pereira, que tamén destacou que participar neste programa da Deputación “é a nosa responsabilidade social”.