DIEGO CALVO PARTICIPA NA ENTREGA DE PREMIOS DA XXII VOLTA CICLISTA A GALICIA

O conselleiro de Presidencia, Xustiza e Deportes, Diego Calvo, participou hoxe na entrega de premios da XXII Volta Ciclista a Galicia, que pechou a súa derradeira etapa en Sanxenxo, tras percorrer case 455 quilómetros polas provincias de Lugo, Ourense e Pontevedra desde o pasado xoves. Diego Calvo entregoulle o galardón ao gañador final da proba, José Luis Faura, do Equipo Cortizo.

Previamente, o conselleiro de Deportes seguiu o desenvolvemento do último tramo da etapa con inicio e meta en Sanxenxo. O pelotón con máis dun cento de deportistas de 18 equipos, oito deles galegos, fixo un percorrido de 127 quilómetros que incluíu tamén os concellos de Meaño, Ribadumia, Vilanova de Arousa, Vilagarcía de Arousa, Caldas de Reis, Portas, Meis e Poio.