En marcha o curso Básico de Análise e Scouting en Fútbol

A Escola Galega de Adestradores da Real Federación Galega de Fútbol continúa co seu compromiso de actualización e formación de técnicos de fútbol e o pasado sábado puxo en marcha o curso Básico de Análise e Scouting en Fútbol, cuxa finalidade consiste en proporcionar aos alumnos a formación nas ensinanzas para identificar, evaluar e analizar tanto a xogadores/as como a equipos, empregando as metodoloxías e ferramentas que dispoñen os clubes de fútbol.

Así, e a través dunha combinación de teoría e práctica, os estudantes aprenderán a utilizar ferramentas tecnolóxicas, a interpretar datos estatísticos e a realizar análises técnico-tácticas que poden marcar a diferencia no rendemento dun equipo.

Esta nova formación é presencial e ten lugar na sede federativa da RFGF en Santiago de Compostela, ubicada no estadio Vero Boquete de San Lázaro.

Plan de formación e carga lectiva

As sesións presenciais celebraranse os sábados en horario de 10 a 14 horas ata o 8 de marzo.

Os obxectivos pretendidos no curso son:

1. Dotar aos estudantes do coñecemento necesario para a análise dos modelos de xogo existentes
2. Formar aos alumnos na análise táctica de equipos, incluíndo a identificación de patróns de xogo, estratexias ofensivas e defensivas e o estudo das fortalezas e debilidades do rival
3. Capacitar na elaboración de informes técnico-tácticos que poidan ser útiles para adestradores e corpos técnicos
4. Crear valor dentro dun corpo técnico
5. Entender a estrutura dunha secretaría técnica nun club profesional
6. Identificar o talento e a proxección no noso equipo dos xogadores analizados
7. Analizar exemplos reais de scouting para entender mellor o que funciona e o que non no contexto real

Inauguración oficial da actividade formativa

O presidente da RFGF, Pablo Prieto, o vicepresidente Javier García e a delegada federativa Silvia Cancela participaron na posta de longo do curso o pasado sábado. O novo reitor do fútbol galego fixo entrega dunha camisola aos coordinadores da actividade: Pablo López e Jesús Puente.