En3vistas afondará na súa nova edición na relación entre a lingua e os seus falantes

As conversas contarán con representantes de diferentes eidos culturais, tales como a moda, a arte, a ciencia, a televisión e a música

Celebraranse cinco faladoiros, entre o 2 e o 6 de agosto, cada un cunha ubicación singular e diferente

O Concello de Pontevedra ofrecerá na primeira semana de agosto a segunda edición do ciclo de entrevistas En3vistas, unha aposta pola normalización da lingua galega a procura de novos referentes en diversos eidos culturais e sociais.

As conversas terán unha proposta tripartita, unha primeira pilula de información a través de Radio Pontevedra cunha entrevista breve aos participantes do ciclo; unha segunda parte coa entrevista aberta ao público e ao aire libre na cidade; e, por último, a posibilidade de seguir todas estes faladoiros en liña, na Rede, ben ao vivo (Facebook e Instagram), ben en diferido (YouTube).

«Esta é unha nova edición, mais mantemos algunhas formas da primeira, igual que certos obxectivos», explica Alberto Oubiña, concelleiro de Normalización Lingüistica. «Por unha banda, queremos amosar a lingua que se vive, que se fala, e coa que se traballa con total normalidade como parte da sociedade. Doutra banda, queremos coñecer a relación das persoas de diferentes eidos coa lingua»

O concelleiro sinala que os convidados pertencerán a cinco eidos diferentes: moda, arte, ciencia, televisión e teatro, e a música. «A lingua é o eixo transmisor de todo este programa, e buscamos aspectos en común, non puramente lingüisticos, entre xente que fai cousas distintas e que as fan en galego».

Nesta ocasión, o departamento de normalización quixo apostar por un formato de entrevista máis clásico, aínda que non se deixará de lado o fomento da conversa pura entre as persoas que van participar. Así, este ano a xornalista Chus Gómesz do Rego, vinculada ao Diario de Pontevedra, collerá o papel de mestra de cerimonias, entrevistando e fomentando o diálogo entre todos os participantes, afondando nos aspectos do día a día lingüistico, amais de coñecer os perfís máis persoais dos poñentes.

Oubiña tamén quixo sinalar o correcto e obrigado cumprimento das normas sanitarias que existan no momento do ciclo, con control de acceso, cadeiras, separación, máscaras e, na procura da comodidade e a mellor experiencia posíbel, unha sonorización adecuada das conversas, tanto para o público presente como para os espectadores dixitais.

Todas as conversas están programadas para as 20 horas.

2 de agosto – Avda. de Santa María – Álex Regueiro e María Viqueira

3 de agosto – Xardíns do Dr. Marescot – Mounqup e Masakazu Shida

4 de agosto – Virxe do Camiño – Iria Veiga e Darío Lago

5 de agosto – Pargue dos Gafos – Carlos Blanco e David Amor

6 de agosto – Ponte do Burgo – Pili Pampín e Ortiga