Esta fin de semana, Ribadumia celebra a tradición, a gastronomía e o deporte
Redacción. DdV
11 agosto, 2023
O sábado 12 de agosto celebrarase a XX Festa do Pan do Salnés e o domingo terá lugar o XXXI Trofeo Concello de Ribadumia
O Concello de Ribadumia ten todo preparado para celebrar, esta fin de semana, a XX Festa do Pan do Salnés e o XXXI Trofeo Concello de Ribadumia, eventos de gran traxectoria e relevancia tanto para os veciños do municipio como para os visitantes.
O sábado 12 de agosto, a Carballeira de Ribadumia acollerá a celebración da Festa do Pan a partir das 17:00, cando se comezan a recoller as sobremesas caseiras e empanadas presentadas ós concursos.
Ás 18:30h terá lugar un obradoiro infantil para coñecer a tradicional elaboración do pan, con entrada totalmente libre sen inscrición previa.
Ás 19:30h farase unha viaxe ó pasado mediante o espectáculo ‘Muiñada’, que permitirá coñecer de onde vimos e non deixar morrer a memoria dos nosos avós e avoas. Unha hora máis tarde, todos os asistentes e a organización sairán cara os Muíños do Batán acompañados do grupo Xironsa, onde se representará unha obra teatral a cargo do grupo Alecrín antes da mostra de elaboración tradicional da moenda de millo.
Ás 22:00h regresarase á Carballeira de Ribadumia para goza da cea de confraternidade a prezos populares, a entrega de premios dos concursos, inchables para toda a familia e posterior verbena a cargo do Dúo La Mecánica. Á medianoite degustarase queimada de forma gratuíta.
O domingo 13 de agosto o contexto muda totalmente e o Concello de Ribadumia celebrará o torneo de fútbol XXXI Trofeo Concello de Ribadumia, que enfrontará ó Umia CF, o CD Ribadumia e o Xuventude de Sisán CF nun torneo triangular. Desde as 19:00h, no Campo de Fútbol A Bouza (Barrantes) poderase gozar deste espectáculo deportivo que unirá a todos os afeccionados ó fútbol do municipio e ó deporte.
Ámbolos dous eventos encherán Ribadumia de diversión e entretemento, e os asistentes poderán gozar da gastronomía, a tradición, representacións teatrais e obradoiros, finalizando a fin de semana con este torneo para celebrar o fútbol, o deporte base e o deporte ribadumiense con toda a veciñanza.