Este venres inauguración da exposición «Unha man que imaxina o mundo» de Menchu Lamas en Évame Oroza

A mostra permanecerá no local de Évame Oroza ata finais de ano.

Este venres 14 de novembro, ás 20:00 horas, inaugúrase no espazo Évame Oroza a exposición Unha man que imaxina o mundo, da artista Menchu Lamas, unha das figuras fundamentais da renovación da arte galega contemporánea. A mostra, en palabras de Alberto Avendaño, conxuga «o silencio do misterio e o silencio do xogo» e invita a deixarse levar pola sensualidade da cor.

Menchu Lamas (Vigo, 1954) é unha das creadoras máis recoñecidas da pintura española contemporánea. Dende as súas primeiras exposicións na Galería Buades de Madrid e a súa participación no movemento Atlántica, destacou por unha linguaxe pictórica que combina o simbólico e o onírico, cunha potente enerxía cromática que converte a cor nunha auténtica protagonista da súa obra. As súas pinturas desprenden forza e vitalidade, xogando co contraste e coa intensidade tonal como elementos expresivos e emocionais.

A artista desenvolve unha iconografía persoal na que o xeométrico e o figurativo conviven en equilibrio, creando imaxes de grande impacto visual e carga poética. A través da cor, Menchu Lamas constrúe un espazo simbólico que fala da identidade, do territorio e da relación entre o humano e o natural, facendo da súa pintura unha experiencia sensorial e espiritual.
A súa obra formou parte de importantes mostras internacionais como a Bienal de São Paulo, Europalia, Five Spanish Artists (Nova York), Caleidoscopio Español ou Spansk–Egen–Art, itinerante por diversos museos escandinavos. Tamén participou en Currents, no ICA de Boston, xunto a artistas como Sigmar Polke, Leon Golub e Anish Kapoor, e en Art d’Aujourd’hui – Art de Femmes no Musée du 20ème Siècle de Viena.

O seu traballo foi exhibido en museos e galerías de toda Europa —Bonn, Colonia, Düsseldorf, Múnic, Hamburgo, Stuttgart e París— e o CGAC dedicoulle unha ampla retrospectiva que viaxou a Milán, Nápoles e Roma. As súas obras forman parte das coleccións máis relevantes, entre elas o Museo Reina Sofía, MACBA, CAAM, MEIAC, CGAC, Museo Patio Herreriano, Fundació La Caixa, Parlamento Español e Parlamento de Galicia.

En 2010 foi recoñecida co Premio de Cultura de Galicia ás Artes Visuais e é membro da Real Academia Galega de Belas Artes.
A exposición Unha man que imaxina o mundo ofrece unha nova oportunidade para mergullarse na forza simbólica e cromática dunha das artistas máis destacadas e singulares da creación contemporánea en Galicia e en España. A mostra poderá visitarse ata finais de decembro.