ETHEL VÁZQUEZ INSTA AO CONCELLO DE GONDOMAR A FACILITAR OS TERREOS PARA QUE A XUNTA INVISTA MÁIS DE 2M€ EN REDUCIR O RISCO DE INUNDACIÓN

• Vázquez Mourelle subliña que se o Concello asumise as responsabilidades que adquiriu no convenio coa Xunta as obras estarían rematadas ou a piques
• Sinala que os Orzamentos da Xunta do vindeiro ano recollen as partidas necesarias para avanzar na actuación, 1,97 M€ en 2024 e 0,15 M€ en 2025, á espera de que o Concello cumpra cos seus compromisos
• Insiste en que o Goberno galego está preparado para actuar no río Miñor, desde a ponte da avenida do Conde de Gondomar ata a ponte da avenida Curros Enríquez; e no Zamáns, desde a ponte da avenida Elduayen ata a súa desembocadura no río Miñor

A conselleira de Infraestruturas e Mobilidade, Ethel Vázquez, instou hoxe ao Concello de Gondomar a facilitar os terreos para que a Xunta invista máis de 2 M€ en reducir o risco de inundacións nos ríos Zamáns e Miñor ao seu paso polo municipio.

A conselleira de Infraestruturas e Mobilidade sinalou hoxe no Parlamento de Galicia que hai máis dun ano que a Xunta está en disposición de iniciar as obras, xa adxudicadas desde o 23 de novembro do 2022.

Detallou que os Orzamentos da Xunta do vindeiro ano recollen as partidas necesarias para avanzar na actuación, recollendo 1,97 M€ na anualidade de 2024 e 0,15 M€ na de 2025.

Neste sentido, lamentou que o Concello de Gondomar non estea a cumprir coa súa parte, coas responsabilidades que adquiriu no convenio de colaboración que asinou coa Xunta, ao non acreditar axeitadamente a posta á disposición dos terreos precisos para actuación.

Ethel Vázquez concretou que a Administración local presentou uns preacordos cos propietarios que non teñen validez ata que sexan ratificados en Pleno e se formalice a acta de ocupación, polo que legalmente é imposible que a Xunta poida iniciar os traballos.

Salientou que “se o Concello fixera o que ten que facer” a estas alturas as obras estarían rematadas ou a piques de estalo, xa que contan cun prazo de execución de 12 meses.