Fernández-Tapias incide na importancia de promover e dinamizar o asociacionismo veciñal con axudas que superan os 600.000 euros na comarca Viguesa

Compartir
Asociación San Miguel de Oia. Fonte: Xunta

A delegada territorial da Xunta en Vigo visita as asociacións de Camiño Vello, e San Miguel de Oia, dous das 14 entidades da cidade de Vigo, que recibiron achegas para reformas e equipamentos ao abeiro do Plan Autonómico de acción comunitaria.

O Goberno Galego financia a través desta convocatoria obras nas instalacións de asociacións de veciños e mulleres rurais, e de comunidades de usuarios de auga, así como a adquisición de equipamento ou reparación de traídas de auga.

Recorda que aínda está vixente o prazo previsto para que as entidades beneficiarias poidan executar o proxecto subvencionado, e presentar as xustificacións.

 

A delegada territorial da Xunta de Galicia en Vigo, Marta Fernández-Tapias, visitou dúas das 14 entidades da cidade beneficiarias da convocatoria de axudas incluídas no Plan específico de acción comunitaria. Concretamente, a representante autonómica achegouse ata a Asociación Veciñal Camiño Vello de Coia e San Miguel de Oia.

Tras as visitas nas que puido comprobar o estado das obras realizadas ao abeiro deste programa, polas que recibiron 14.308 euros no caso da primeira e 17.000 na segunda, a representante autonómica incidiu na importancia de promover o asociacionismo e a dinamización do movemento veciñal en beneficio da mellora da calidade de vida local.

A Xunta destinou este ano 2,5 millóns de euros a esta liña de axudas con 43 subvenciones concedidas na área territorial de Vigo por importe de 601.241 euros, tal e como subliñou a representante autonómica. En canto ao concello vigués, foron 14 as asociacións beneficiarias con máis de 201.000 euros.

Fernández-Tapias remarcou a aposta da Xunta por atender ao asociacionismo veciñal, contribuíndo a mellorar a calidade e vida local mediante investimentos tanto de obras nos locais sociais como na dotación do equipamento para levar a cabo as súas actividades.

 

Asociación Camiño Vello en Coia. Fonte: Xunta

 

Asemade, a delegada recordou que aínda está vixente o prazo, ata o 15 de novembro, para que as entidades beneficiarias poidan executar o proxecto subvencionado e presentar a correspondente xustificación dos investimentos realizados. “O ampliamos co fin de facer viable o proceso e posibilitar o cumprimento do procedemento de xestión”, remarcou.

No marco destas achegas, as asociacións de veciños e asociacións de mulleres rurais beneficiarias reciben apoio para financiar os seus proxectos relacionados co acondicionamento, reforma e ampliación dos locais sociais e compra de novos equipamentos, o que lles permite manter o seu funcionamento, a prestación de novos servizos e a organización de actividades.

Neste caso, a Asociación de Veciños Camiño Vello destinou as achegas a obras de acondicionamento e aforro enerxético, mentres que en San Miguel de Oia serviron para reformar parte das súas instalacións e para a compra de equipamento audiovisual e informático.

En canto ás comunidades de usuarios de augas, incluídas na orde, ademais dos anteriores investimentos, poden destinar estas axudas a obras de mellora, reforma e reparación das infraestruturas e instalacións das traídas de auga comunitarias.