Galicia reforza os lazos con Madrid como principal emisora de turistas e peregrinos

O presidente da Xunta, Alfonso Rueda, destacou hoxe a importancia de Galicia como terra hospitalaria e o papel clave do turismo procedente de Madrid durante a súa intervención no acto ‘Madrid, tengo algo que decirte’, celebrado na Casa de Galicia en Madrid. O evento contou tamén coa participación do alcalde da capital española, José Luis Martínez Almeida.

Rueda subliñou que entre xaneiro e outubro de 2024 máis de 1,2 millóns de turistas madrileños visitaron Galicia, o que converte a esta comunidade na principal emisora de visitantes. Ademais, apuntou que 35.000 madrileños realizaron o Camiño de Santiago, situando a Madrid como a segunda autonomía con máis peregrinos, só superada por Andalucía.

Durante a súa intervención, o presidente galego salientou que tanto Galicia como Madrid son terras abertas e acolledoras, recoñecidas por recibir con entusiasmo a todos os que as visitan ou deciden establecerse nelas. Ademais, agradeceu aos madrileños a súa boa acollida aos galegos residentes na capital española, ao tempo que animou a seguir descubrindo os múltiples atractivos de Galicia, como as rutas do Camiño, as praias, a rica gastronomía ou o patrimonio cultural.

Impulso ás relacións Galicia-Madrid
Rueda incidiu na necesidade de seguir reforzando os lazos entre as dúas comunidades, co turismo como un dos piares fundamentais. Resaltou tamén a aposta da Xunta por consolidar un turismo ordenado, que non só incremente o número de visitantes senón que fomente a desestacionalización.

Os datos máis recentes do sector avalan esta estratexia: en 2024, Galicia rexistrou preto de medio millón de peregrinos, cun aumento notable de turistas internacionais, que representan xa o 30 % do total. Ademais, cada vez máis visitantes escollen a comunidade galega en meses fóra da tempada alta, como marzo ou novembro.

O presidente rematou a súa intervención animando aos madrileños a seguir elixindo Galicia como destino, asegurando que cada visita ofrece unha experiencia única e inesquecible.