Ibuprofeno Teatro regresa en novembro coa mensaxe ecolóxica de “O mel non caduca”

A representación terá lugar o sábado 6 de novembro ás 20.00 horas, e o aforo amplíase ata as 678 prazas.

As entradas están á enta en www.ataquilla.com a 5 euros, (máis custes de xestión), e con bonificación para maiores, parados e posuidores do carné xove.

O ciclo de teatro galego que organiza a Concellería de Cultura xunto coa Agadic regresa ao Auditorio o sábado 6 de novembro, co novo espectáculo de Ibuprofeno Teatro. A premiada compañía presenta na capital arousá “O mel non caduca”, unha obra con mensaxe ecoloxista e anti consumista que alerta sobre as consecuencias do que pode chegar ao medio ambiente, e tamén ás persoas, de continuar polo camiño que imos. As entradas xa están a venta en www.ataquilla.com e no teléfono 902 504 500. A entrada xeral custa 5 euros, e as bonificadas para maiores d 65 anos,. Titulares do carné xoven e desempregados 3 euros, (máis custes de xestión na venta anticipada).

Avelino González e Marián Bañobre compoñen o elenco de actores que dan vida á peza creada e dirixida por Santiago Cortegoso, e que a propia compañía define como un espectáculo biodegradable e ecosostible xestado a partir dun proceso de creación colectiva, arredor da relación do ser humano cos obxectos, da degradación ecolóxica do planeta por mor da perversa lóxica consumista do capitalismo e da obsolescencia programada, tanto dos produtos como das persoas.

Sinopse

Dous científicos/apicultores, en 2173, levan a cabo sofisticados e absurdos experimentos, nun contexto de futuro distópico no que o planeta está arrasado. Tratan de crear sinteticamente unha abella a partir do último tarro de mel que se conserva na historia. Constrúen unha árbore no seu laboratorio para tratar de recuperar os ciclos naturais, que se perderon hai tempo.

Dous irmáns volven á casa familiar na aldea pola morte da súa nai. O conflito aflora cando deben xestionar as pertenzas familiares. O irmán máis vello opta por vendelo todo. A rapaza, máis nova, entra nunha crise vital porque se debate entre a súa acomodada vida nunha cidade afastada e a nostalxia que lle produce volver entrar en contacto cos obxectos e os recordos que marcan a súa historia vital.