Javier Pitillas, convidado especial nos Parladoiros do Pazo de Mos

O Pazo de Mos acolleu este luns unha nova sesión dos Parladorios, nun encontro marcado pola emoción, a reflexión e o compromiso coa inclusión. O convidado especial foi Javier Pitillas, Policía Local xubilado e co-responsable de DisCamino, un proxecto cheo de humanidade, inclusión e superación a través do Camiño de Santiago.

A sesión, na que estivo sempre presente a figura de Gerardo Fernández Costa, o grande impulsor deste proxecto, recentemente falecido, converteuse nunha conversa inspiradora e profundamente emotiva, acompañada durante todo o evento pola música en directo de Ana Belén Rodríguez, que contribuíu a crear un clima cálido e de conexión entre público e protagonista. A nota divertida púxoa o Mago Marco, co que o propio Pitillas se atreveu a facer un número de maxia.

Un proxecto que une deporte, superación e comunidade

Durante o encontro, Pitillas compartiu a traxectoria de DisCamino, iniciativa fundada en 2009 para permitir que persoas con discapacidade física, intelectual ou sensorial poidan realizar o Camiño de Santiago con acompañamento e bicicletas adaptadas.

Mos e DisCamino manteñen unha relación consolidada ao longo dos anos:

• O Concello conta cun convenio anual coa entidade.
• DisCamino participa sempre na Carreira Contra o Cancro de Mos.
• Colabora habitualmente en actividades educativas e deportivas nos centros escolares do municipio.

Esta vinculación converte a DisCamino nun aliado estratéxico de Mos na promoción da inclusión real e do deporte adaptado.

Vínculo co sistema educativo de Mos

A intervención de Pitillas enmárcase tamén no programa anual de sensibilización nos centros educativos de Mos. DisCamino desenvolve, ao longo desta semana na que se Conmemora o Día Internacional das Persoas con Discapacidade (3 de decembro), actividades destinadas ao alumnado de 6º de Primaria, incluíndo experiencias con handbikes de montaña para traballar valores como empatía, accesibilidade, diversidade e autonomía persoal.

Mos reafirma o seu compromiso coa inclusión

A Fundación Pazo de Mos e o Concello agradeceron a ampla participación da veciñanza e destacaron a importancia de seguir impulsando espazos como os Parladorios, que dan voz a proxectos transformadores e fortalecen o compromiso colectivo coa igualdade de oportunidades.