Luis López anuncia a aprobación dun convenio co Concello de Mos para destinar 1,5 millóns de euros á mellora da mobilidade peonil na estrada provincial EP-2601 Mos-Puxeiros

O proxecto, financiado ao 80% pola Deputación, contempla a creación dun itinerario peonil duns 1.350 metros de lonxitude á altura de Dornelas

O presidente da Deputación de Pontevedra, Luis López, anunciou hoxe que a institución provincial avanza na posta en marcha das obras para mellorar a mobilidade peonil na estrada provincial EP-2601 Mos-Puxeiros, en Mos, coa aprobación do convenio de colaboración co Concello. O proxecto ten un orzamento de 1,5 millóns de euros, dos que a Deputación aporta o 80% (máis de 1,2 millóns de euros) e o Concello o 20% restante, é dicir, 300.000 €.

A través deste proxecto melloraranse as características da estrada, así como as condicións de seguridade e mobilidade para peóns e vehículos á altura de Dornelas. Desta maneira, crearase un itinerario peonil duns 1.350 metros de lonxitude, cunha senda de formigón coloreado de 2,50 metros de ancho na marxe esquerda da vía.

Ademais, o presidente provincial explicou que o convenio tamén contempla a pavimentación da calzada no treito da actuación, a renovación da rede de drenaxe e do alumeado público, a execución de elementos físicos de calmado de tráfico e a colocación de mobiliario urbano. Entre outras cuestións, tamén se soterrarán os servizos afectados.