Luis López salienta que a Deputación destinará máis de 2,5 millóns de euros para financiar ao 100% investimentos en seis concellos da provincia

. Luis López puxo en valor que a Deputación de Pontevedra vai destinar máis de 2,5 millóns de euros para financiar ao 100% investimentos en seis concellos da provincia.

Trátanse de grandes proxectos en Catoira, Fornelos de Montes, Moraña, As Neves, Salvaterra de Miño e Valga, que serán acometidos integramente con recursos da institución provincial a través dos plans PON2030 e o Extraordinario de Infraestruturas Deportivas, así como do +Provincia.

Neste eido, a Xunta de Goberno da Deputación aprobou esta semana unha inxección de 900.000 euros do Plan +Provincia cos que se completará o financiamento ao 100% dos proxectos nestes seis concellos e se impulsarán novas actuacións en Barro, Caldas e Poio. “No que levamos de ano distribuímos xa 16,6 millóns de euros do +Provincia, o plan que está a tender pontes cos concellos como nunca antes se fixera, cos concellos de menos de 50.000 habitantes da provincia”, asegurou Luis López.

En Valga os fondos provinciais permitirán financiar na súa totalidade a construción dunha senda peonil e vía ciclable na contorna do Lago Porto Piñeiro, que conta cun orzamento de 615.000 €. Ata o de agora, o Goberno local tiña recibido 522.000 € do PON2030 da Deputación e o importe restante correspondíase con achegas municipais que, agora, serán sufragadas con recursos do Plan +Provincia (92.000 €).

No caso de Salvaterra de Miño trátase da recuperación do espazo para uso peonil na rúa da Forca, que conta cun orzamento de 540.000 € . O Concello tiña recibido xa 432.000 € do PON2030 da Deputación e o importe restante, correspondente coas achegas municipais, procederá de recursos do Plan +Provincia (108.000 €).

Pola súa banda nas Neves a Deputación financiara o 100% das obras de acondicionamento da Praza de Santa María de Liñares. A actuación conta cun orzamento de 530.000 € dos cales o Concello recibiu xa 475.000 € do PON2030 e o importe restante será sufragado con recursos do Plan +Provincia (53.000 €).