Mañá Xoves 12 de xuño. A Universidad Intercontinental de la Empresa celebra en Vigo a súa cerimonia de graduación

• Abel Caballero recibirá a Medalla de Honra da UIE e será distinguido como profesor honorario da facultade de Administración de Empresas e Dereito

• A UIE finaliza o seu terceiro curso 2024-2025 con cinco graos e ten aberto o prazo de matrícula para o vindeiro curso, no que incorporará unha nova titulación, o Grao en Dereito

A terceira promoción do Máster en Dirección e Administración de Empresas (MBA) da Universidad Intercontinental de la Empresa e a do grao en ADE-BBA de UIE-IESIDE graduaranse mañá, xoves 12 de xuño, ás 17.00 h, nunha cerimonia que se celebrará na Sede Afundación Vigo e que poderá seguirse por streaming a través de Afundación TV.

O auditorio da Sede, coa capacidade completa, acollerá o acto académico no terceiro ano de implantación da Universidad Intercontinental de la Empresa, no que Abel Caballero recibirá a medalla de honra da UIE e será distinguido como profesor honorario da Facultade de Administración de Empresas e Dereito. Unha distinción aprobada polo Consello Reitor de UIE  en sesión celebrada o pasado 9 de abril, en recoñecemento á súa traxectoria académica e de servizo público e, en particular, por ter apoiado institucionalmente e como profesor o proxecto da Escola de Negocios, xerme da actual UIE.

Doutor en Ciencias Económicas polas universidades de Santiago de Compostela e Cambridge e alcalde de Vigo, actuará como padriño das promocións 2025 da UIE ante os que pronunciará unha conferencia maxistral.