MARÍN. Continúan as obras de saneamento do río Lameira, que xa chegan á altura de Ponte Zapal

Estase a renovar todo o colector, liberando o cauce do río, creando un novo depósito e conectádoo co novo colector da
Avenida de Ourense. Tamén se habilitará unha nova senda fluvial para o paseo

As obras de mellora do saneamento do río Lameira continúan o seu curso e xa están traballando á altura de Ponte Zapal. Este é un ambicioso proxecto, financiado con máis de 3 millóns de euros pola Xunta de Galicia, que se centra en toda a rede de augas residuais da cunca do Lameira, que finaliza no bombeo do mesmo nome. Ese caudal chega ata o colector da Avenida de Ourense, onde finalmente impúlsase o saneamento ata a EDAR de Placeres. Este colector é un dos fundamentais de toda a rede de saneamento municipal, xa que cobre este servizo na maior parte do casco urbano.

A orixe do colector está na PO-313, pero a maior parte discorre polo propio leito do río. Isto, sumado a que existe unha rede única (que suma fecais e pluviais) en gran parte da rede e o alto grado de infiltración de auga de chuvia no sistema, provoca que se sobrepase o caudal máximo do sistema e que, polo tanto, se produzan verquidos incontrolados ao medio ambiente.

Polo tanto, con este proxecto integral búscase resolver esta problemática, actuando en distintas cuestións:

● Renovación do colector do Lameira: retirarase o colector do cauce do río e colocarase un novo a cinco metros do cauce. Isto permitirá renaturalizar o río e crear unha senda peonil sobre o novo colector. Ademais, crearase un novo depósito de retención no parque do Souto, xunto ao CEIP Sequelo.

● Mellora do bombeo do Lameira: é o que está situado no parque infantil fronte a Correos e desde o que se impulsa o caudal hidráulico ata o colector da Avenida de Ourense. Renovaranse os equipos electromecánicos e instalarase unha nova tubaxe que conecte co colector principal da Avenida de Ourense, renovado hai tres anos.

● Intervencións puntuais na rede existente: o obxectivo é separar as redes pluviais da do saneamento, para evitar o exceso de caudal. Inclúense seis intervencións neste sentido nas zonas de Coirados, Jaime Janer, Barriada de Suboficiais, Lavadoiro do Souto e na zona de Mogor.

En total, estase a actuar nunha lonxitude de 1.600 metros cadrados, e farase unha inversión importantísima superior aos 3 millóns de euros aportados pola Xunta de Galicia, grazas ao convenio firmado polo Concello, que aportou 80.000 euros de fondos propios para o custe das expropiacións.