Miranda e Fernández-Tapias visitan FEVEGA en Vigo

Compartir

Miranda e Fernández-Tapias visitan Fevega en vigo para comprobar a recollida de preto dunha tonelada e media de medicamentos para os galegos de Venezuela

 

Esta acción solidaria conta coa colaboración da Xunta de Galicia e complementa a acción directa de axuda da administración autonómica aos galegos que viven no país caribeño

 

O secretario xeral da Emigración, Antonio Rodríguez Miranda, visitou á Federación Venezolana de Galicia (FEVEGA) para comprobar a recollida de preto dunha tonelada e media de medicamentos que serán destinados aos galegos que os necesiten en Venezuela.

 

Estivo acompañado pola delegada da Xunta en Vigo, Marta Fernández-Tapias, e o presidente da Federación, Manuel Pérez.
Esta asociación realiza, co apoio da Xunta de Galicia, unha campaña de recollida ao longo de todo o ano para axudar a poboación galega de Venezuela. Nesta iniciativa colaboran varias entidades que apoian a Fevega, como é a Asociación Socio Cultural Deportiva “Amigos de Venezuela en Vigo”, a Asociación de Venezolanos do Deza, a Asociación Ourensana Venezolana “Alma Llanera”, a Asociación Cultural de Venezolanos de Santiago (AVESANTI) e a Hermandade Venezolana das Rías Baixas.
Unha vez que chegan os medicamentos ao país americano, o envío é distribuído pola Hermandad Gallega de Venezuela coa colaboración do Centro Gallego de Maracaibo, do de Puerto La Cruz e da Hermandad Gallega de Valencia.

 

Ademais de medicamentos, o envío contou tamén con outros produtos de tipo sanitario moi demandados e de difícil acceso neste país como é o material ortopédico ou cueiros para persoas dependentes.

 

A Federación Venezolana de Galicia é unha agrupación de asociacións sen ánimo de lucro e de ámbito autonómico que naceu en 2009, co obxectivo de apoiar aos seus asociados nos seus ámbitos de actuación e desenvolver accións de atención aos emigrantes retornados no seu proceso de integración social, laboral e cultural en Galicia.

 

Tal e como destacou Rodríguez Miranda, a labor desta asociación é fundamental no apoio aos galegos retornados deste país americano, xunto co traballo que desenvolve a propia Secretaría Xeral da Emigración a través das oficinas de información ao Retorno, unha das cales se atopa precisamente en Vigo, na Delegación Territorial da Xunta de Galicia. Por outra banda, a propia asociación conta cunha oficina itinerante que percorre os diferentes concellos de Galicia para ofrecer o seu apoio a este colectivo.