Nidia Arévalo defenderá no Senado unha moción sobre infraestruturas na que reclama a transferencia da AP-9 e a chegada dos trens Avril

Os deputados e senadores galegos do PP levan ás Cortes Xerais unha ampla batería de iniciativas sobre reivindicacións da nosa Comunidade

• “Serán uns plenos á galega, nunha semana moi importante para Galicia nas Cortes Xerais”, subliñan os representantes do PPdeG
• O ministro de Transportes terá que dar conta no Congreso sobre “o lamentable estado de conservación das autovías estatais e estradas nacionais en Galicia”
• Nidia Arévalo defenderá no Senado unha moción na que reclama a transferencia da AP-9 ou a chegada dos trens Avril, mentres que José Manuel Barreiro interpelará ao Executivo sobre a situación dos Perte, José Manuel Rey sobre as dotacións orzamentarias para Navantia Ferrol e Francisco Fernández polo financiamento dos servizos de dependencia

Na Cámara Alta, os senadores galegos presentaron unha moción, unha interpelación e dúas preguntas orais dirixidas ao Goberno central.

A moción, que será defendida pola senadora por Pontevedra e alcaldesa de Mos, Nidia Arévalo, reclama ao Goberno a transferencia á Xunta de Galicia da titularidade da autoestrada AP-9, así como a posta en marcha do servizo de suficientes trens Avril de rodadura desprazable, que comuniquen as cidades galegas do Eixo Atlántico entre si. Ademais, pide a conexión das devanditas cidades coa capital de España a través da Alta Velocidade; así como a conexión entre Vigo e a cidade portuguesa do Porto.

Igualmente, a moción solicita, nun segundo punto, o desenvolvemento do Plan Director do Corredor Atlántico Noroeste comprometido, a creación dun Plan de conservación integral dos firmes na Autovía do Noroeste (A-6), que inclúa a reconstrución e posta en servizo dos viadutos do Castro, tanto en sentido Madrid como en sentido A Coruña; o deseño dun Plan de conservación extraordinaria para a posta a punto dos firmes das vías A-6, A-52, A-55, AP-53, N-120 e N-642; a conclusión da conexión Santiago-Lugo (A-54); a axilización da circunvalación de Pontevedra (A-57); o inicio da Autovía da Mariña (A-74); e o eixo Ourense-Lugo.

En terceiro lugar, a iniciativa dos populares pide tamén ao Goberno central a redistribución dos fondos europeos non comprometidos dentro dos Next Generation polo Estado e outras comunidades, de modo que desde o Goberno galego se poidan financiar proxectos preparados en materia de estradas, mobilidade sostible e outros como aparcadoiros seguros para transporte de mercadorías, asegurando o cumprimento dos fitos marcados pola Unión Europea.