O alcalde, satisfeito: “Os grandes proxectos de Vigo están recollidos nos Presupostos Xerais do Estado”

Compartir
Abel Caballero durante a súa comparecencia en rolda de prensa este xoves. Fonte: Concello

O AVE Vigo-Ourense por Cerdedo, a saída sur ferroviaria ou o tramo da A52 Vigo – Porriño en túnel son os tres “grandes proxectos da cidade”, que aparecen no documento orzamentario. O rexedor destaca o orzamento de 39 millóns de euros de Zona Franca, e o incremento dun 40% na achega estatal ao Marco.

 

Abel Caballero referiuse este xoves en rolda de prensa aos “tres grandes temas pendentes da cidade que están en marcha”, tal e como recolle o documento do Goberno de España ante o que amosou a súa “grande satisfacción”.

“Aparece o AVE Vigo-Ourense por Cerdedo, que entra no seu terceiro ano de estudo hidroxeolóxico e xa temos luz verde porque sabemos que vai ser positivo”, apuntou o rexedor. O outro proxecto recollido nos Presupostos Xerais do Estado é a saída sur ferroviaria Vigo-Portugal, que se encontra en fase de estudo das alternativas, o que supón “o principio para iniciar a gran obra” e, no tocante á finalización da A52 no tramo Vigo-Porriño en túnel, sinalou que está no estudo inicial “e sen os estudos iniciais non se fan as obras e atópanse así porque non os iniciou Rajoy no ano 2013 e algunha desas obras, como o AVE, parárona”.

Os Presupostos Xerais do Estado reflicten que “a Dirección Xeral de Planificación e Avaliación da Rede Ferroviaria continuará en 2022 os estudos relativos á conexión Vigo fronteira portuguesa, e á conexión Vigo-Ourense por Cerdedo”.

Ademais, Caballero referiuse á Biblioteca Pública do Estado, que aparece no documento cun orzamento de 50.000 euros para a preparación da licitación do proxecto; un compromiso que “garantiu o Ministro Iceta” ao alcalde hai uns días en Madrid, un proxecto ao que se opoñen Feijóo e a Xunta de Galicia, en palabras do rexedor.

Os PXE recollen tamén a renovación do tramo Vigo-Redondela-Ourense do Corredor Noroeste para o tráfico de mercadorías, que “é tan importante para Vigo” e os “grandes investimentos de Zona Franca”, cifrados en 39 millóns de euros, o que supón duplicar o orzamento do ano 2021.

O alcalde salientou o orzamento para a Panificadora de 5,4 millóns de euros: “imos refacer a Panificadora e vaina costear ZF na súa totalidade”. Amais, para a ampliación do PTL ,(Parque tecnolóxico e loxístico de Valladares), o Goberno destina 2,2 millóns de euros, para a recuperación e posta en valor da Muralla de Ou Castro 56.000 euros e para o inicio da obra na ETEA do Instituto de Investigacións mariñas 1 millón de euros.

Referiuse tamén Caballero ao incremento da achega estatal ao MARCO nun 40%, pasando de 35.000 a 50.000 euros anuais: “isto é moi significativo porque é o museo de arte contemporánea máis importante de Galicia” e reclamou á Xunta de Galicia que incremente na mesma proporción a súa achega ao museo.