O BNG de Vigo urxe un plan de protección do arboredo urbano fronte á “motoserra” de Caballero

Denuncia o “clamoroso silencio” do Goberno municipal á pregunta da fronte nacionalista pola xustificación para a talla masiva de árbores na Avenida de Castelao

Xabier P. Igrexas: “O alcalde leñador non acaba de entender que as árbores non son elementos ornamentais senón unha peza absolutamente esencial no ecosistema urbano”

En declaracións do portavoz municipal do BNG de Vigo, Xabier P. Igrexas, demandando un plan de conservación e protección do arboredo urbano para poñer fin ás tallas masivas e desproporcionadas, a última estes días nunha área de case 2.500 metros cadrados da Avenida de Castelao.

“O BNG esiximos a Abel Caballero que abandone dunha vez por todas a motoserra depredadora e que garanta o dereito das viguesas e vigueses a unha cidade sustentábel e moito máis verde”, reivindicou Igrexas.

Así o demandou o portavoz municipal do BNG de Vigo, Xabier P. Igrexas, após unha nova talla masiva de árbores nos últimos días nunha área de 2.500 metros cadrados no bulevar da Avenida de Castelao, onde apenas quedaron 3 exemplares de gran porte en pé.

A fronte nacionalista interpelou sobre esta cuestión ao Goberno municipal na Comisión Informativa de Medio Ambiente celebrada este luns para preguntar sobre a xustificación técnica e ambiental deste “arboricidio” no barrio de Coia. “A resposta foi a de sempre: un clamoroso silencio”, denunciou Igrexas.

O portavoz do BNG asegurou que esta actuación engádese a un longo historial de tallas inxustificadas por parte de Abel Caballero durante os últimos anos en diferentes ámbitos da cidade: Gran Vía, Ronda de Don Bosco, o monte do Castro, na praza da Miñoca, en Gregorio Espino, Martínez Garrido ou Samil. No mesmo sentido, criticou o “maltrato reiterado” contra os exemplares dos xardíns históricos da Alameda, “vandalizados” para ser postes de luces de nadal, ou reformas como a peonalización da Porta do Sol que non contan con arboredo, agás un salgueiro chorón “enclaustrado nunha rídicula maceta-banco”.

Fronte a esta situación, dende o BNG volveron demandar un plan de conservación e protección que garanta un axeitado tratamento do arboredo urbano, evitando o seu deterioro e perigosidade en situacións de alerta meteorolóxica. “A cidade de Vigo non soporta máis arboricidios que supoñen unha política suicida en termos ecolóxicos”, subliñou Igrexas, quen afeou que “o alcalde leñador non acabe de entender que as árbores non son cousas nin elementos ornamentais, senón unha peza absolutamente esencial no ecosistema urbano”.

Igrexas rexeitou as habituais xustificacións do Goberno local e chamou a avanzar nun modelo de cidade máis sustentábel e moito máis verde. “Nin as obras de humanización nin motivos estéticos xustifican a talla e retirada de arboredo de gran porte que, no mellor dos casos, é substituído por exemplares moito máis pequenos e de moito menores beneficios ambientais”