O Concello de Marín insiste en pedir civismo, e loitar contra os verquidos de enseres

O teléfono deste servizo é gratuito e é obrigatorio avisar para que poidan atender as peticións de recollida de xeito ordenado

A recollida de enseres voluminosos é un servizo que presta o Concello de Marín á veciñanza, a través da empresa Recolte e que permite manter o espazo urbano ordenado e limpo

Para iso, cóntase cun teléfono gratuito, o 900 102 580, ao que os veciños e veciñas deben chamar para avisar de que precisan desfacerse dun enser de gran tamaño (mobles, electrodomésticos…), que terán que depositar no colector indicado pola empresa o día que se lles diga, para que así sexa recollido á maior brevidade posible.

Enseres Ameal despois. Fonte: Concello

Sen embargo, e a pesar das constantes campañas de concienciación potenciadas polo Goberno local, seguen a darse verquidos descontrolados deste tipo de residuos, que ademáis de ser un foco de suciedade, supoñen un impacto negativo na estética pública, tanto no centro urbán coma no rural.

Enseres Viñas Blancas antes. Fonte: Concello

“Pedimos á veciñanza que teña conciencia cívica neste sentido. Sabemos que moita xente cumpre, chama ao teléfono e segue as indicacións, pero aínda hai focos de verquido que supoñen un importante problema”, explicou a concelleira de Medio Ambiente, Marián Sanmartín.

Viñas Blancas despois. Fonte: Concello

Ademais, o feito de ter que atender verquidos que non están avisados, afecta á calidade total do servizo, dado que se poden producir retrasos na atención daqueles depósitos de enseres que sí se fan cumprindo co protocolo.

Bo nivel de reciclaxe

Así a todo, desde a Concellaría de Medio Ambiente tamén se destacan os bos datos que nos últimos tempos se están colleitando na vila no que respecta á recollida separativa.

Segundo datos aportados por Ecoembes a principios de ano, a porcentaxe de residuos impropios, (os que acaban no colector amarelo erróneamente a que afectan á calidade da reciclaxe dos envases lixeiros,) sitúase no 45%, baixando moito do 65% rexistrado no 2011.

No que respecta ao papel e cartón, tamén hai unha gran tendencia á reciclaxe, que aumentou case un 90% en comparación coas marcas rexistradas os últimos anos.