O Concello de Mos recibe ao doutor e divulgador Manuel Viso

 alcaldesa de Mos, Nidia Arévalo, recibiu esta mañá no Concello ao doutor Manuel Viso, médico ourensán, divulgador e autor do libro “Supersanos”, publicado recentemente pola editorial HarperCollins.

O doutor Viso é un profesional recoñecido pola súa intensa actividade divulgativa e formativa no ámbito da saúde. Licenciado en Medicina pola Universidade de Santiago de Compostela, conta con catro másteres —en Xestión Sanitaria e Dirección Médica, Peritaxe Médico e Psicosocial, Nutrición e Xerontoloxía— ademais dun posgrao en Medicina e Nutrición Deportiva e formación en Bioloxía Molecular no Hospital de Sant Pau de Barcelona.

A súa traxectoria combina a práctica médica coa divulgación en medios de comunicación e redes sociais, nas que reúne unha ampla comunidade de seguidores. O seu labor destaca pola capacidade de achegar información rigorosa e accesible sobre saúde, alimentación e benestar, dirixida tanto a adultos como a nenos e familias.

Durante o encontro institucional, a alcaldesa e o doutor intercambiaron impresións sobre a importancia de promover hábitos saudables desde idades temperás e de fomentar a educación sanitaria como ferramenta de transformación social.

“O doutor Viso é un exemplo de compromiso e paixón pola saúde. O seu traballo como médico e divulgador axuda a mellorar a calidade de vida das persoas e a crear unha sociedade máis informada, consciente e responsable co seu propio benestar.”

O Concello de Mos agradeceu a visita e amosou interese en futuras colaboracións relacionadas coa educación para a saúde e a prevención, no marco de programas municipais orientados ao benestar da veciñanza.