O Concello de Vigo conxela os impostos no 2022: “Temos que consolidar a recuperación”

As taxas e impostos municipais terán un “incremento nominal cero” o ano que vén. O goberno de Vigo non aplicará o IPC, porque “quero facerlle un xesto á difícil situación económica dos cidadáns”, afirmou Caballero, e para “consolidar a recuperación Covid que está a haber” na cidade. Ademais a cidade aplica exencións fiscais por 17 millóns de euros.

“Estou moi satisfeito de tomar esta decisión, porque temos que consolidar a recuperación Covid que está a haber en Vigo”, valorou Caballero, quen informou este venres da conxelación nominal das taxas e impostos municipais no próximo ano. A mesma medida xa se tomara para este 2021, co que será o segundo exercicio fiscal consecutivo sen aplicar o Índice de Prezos ao Consumo (IPC).

“A norma é incrementar os impostos igual que os prezos, pero eu non quero facelo, quero facerlle un xesto á difícil situación económica dos cidadáns de Vigo e por iso o incremento nominal será cero” en 2022, explicou o rexedor. A decisión representa deixar de ingresar catro millóns de euros (un incremento do IPC do 3,5%) que, desta forma, quedarán “nos petos dos vigueses”.

Ademais, Caballero subliñou que o Concello que preside mantén a “taxa cero” para terrazas e incorpora como novidade a exención do pago das taxas municipais de obras de adaptación da vivenda a aquelas familias con baixos ingresos, preto de catro mil que tamén están libres de abonar o lixo tamén por criterios de renda.

En 2022, o goberno de Vigo aplicará exencións e bonificacións fiscais por valor total de 17 millóns de euros. Detallou Caballero que, deste total, 8,5 millóns corresponden aos impostos: cinco millóns de euros en concepto de IBI, dous millóns en vehículos, 1,1 millóns en plusvalía, 215.000 euros do IAE e 235.000 euros do ICIO. Os outros 8,5 millóns proceden das taxas e prezos públicos que o Concello non cobra, por exemplo, a aquelas entidades deportivas con convenio municipal para o uso das instalacións municipais.