26 octubre, 2021
O obxectivo é fomentar o uso da lingua galega dun xeito participativo e divertido, especialmente entre a xente nova.
O Servizo de Normalización Lingüística do Concello do Grove, a través do programa de dinamización lingüística FalaRedes da Secretaría Xeral de Política Lingüística, traerá en novembro ata a vila meca dúas novas actividades para promover o uso do galego entre a veciñanza.
A primeira delas terá lugar o venres 5 de novembro, ás 18.00 horas na Casa da Cultura Manuel Lueiro Rey e leva por título “Sabios, xogos e xograres. Xogos medievais para os tempos actuais”. Esta actividade, pensada para conmemorar este ano o oitavo centenario do nacemento do rei Afonso X, consiste nunha amena presentación da obra lúdica do Rei Sabio, de xeito que tanto a xente nova como a máis maior poida coñecer de maneira práctica o legado que deixou o sobranceiro monarca no seu Libro dos Xogos: Xadrez, Dados e Táboas a través dunha achega a xogos hoxe en desuso e que nalgúns casos deron lugar a variantes doutros xogos ben coñecidos na actualidade. Así pois, poranse á disposición das persoas participantes máis de trinta taboleiros que permitirán xogar 2 ou 4 persoas simultaneamente en cada un.
Xusto unha semana despois, o venres 12 de novembro, no mesmo lugar e á mesma hora, a compañía Teatro de Ningures presentaranos O Ogrocho, unha obra para público infantil e familiar protagonizada por un pequeno ogro de seis anos que descobre as características que o diferencian do resto do alumnado cando comeza o colexio. Coa súa forza extraordinaria e a terrible herdanza de ogro, intenta reconciliarse coa súa parte oculta, dominar os seus instintos e parecerse aos demais. Para iso terá que superar varias probas. Esta peza teatral aborda moitos e variados conceptos, como a superación, a imaxinación, o amor, a natureza humana, a valentía, a moral etc., para amosarlles aos nenos e ás nenas a complexidade de ser persoa.
A entrada para ambas as actividades será de balde, mais a capacidade é limitada, polo que cómpre inscribirse previamente na Biblioteca Pública Municipal do Grove, (de luns a venres, de 10.00 a 13.30 h e de 16.00 a 20.00 h), no teléfono 986 732 341, a través do correo electrónico biblioteca@concellodogrove.es ou nas redes sociais da Rede de Bibliotecas do Grove.
Durante o desenvolvemento destas actividades respectaranse as medidas de seguridade, protección e hixiene establecidas polas autoridades sanitarias para a prevención da Covid-19.
Alerta