O CONSELLO DA XUNTA AUTORIZA A LICITACIÓN DO SERVIZO DE TRANSPORTE SANITARIO URXENTE DO 061 NA ÁREA DE VIGO

• O contrato para prestar servizos nos concellos de Vigo, Cangas e Moañas licitarse por un período de dous anos, coa posibilidade de prorrogarse por un ano máis, acadando así un valor estimado de 18,8 M€

• Incrementará os recursos da rede de transporte sanitario urxente de Galicia-061 coa incorporación dunha ambulancia de soporte vital avanzado de enfermería en Moaña e unha ambulancia de soporte vital básico en Vigo

• Permitirá que todas as ambulancias de soporte vital avanzado dispoñan de novos recursos de electromedicina como bioanalizadores de sangue, ecógrafos, padiolas semieléctricas e monitores con capacidade de transmisión de datos

• Con esta licitación a Fundación Pública Urxencias Sanitarias de Galicia-061 finaliza a renovación de todos os contratos do servizo de transporte sanitario urxente na comunidade

O Consello da Xunta autorizou hoxe a contratación do servizo de transporte sanitario urxente terrestre da Fundación Pública Urxencias Sanitarias de Galicia- 061 na área de Vigo, que inclúe os concellos de Vigo, Cangas e Moaña.

O contrato sairá a licitación cun importe de 12.560.048,23 euros por un período de dous anos, prevéndose a posibilidade de prórroga por un período máximo de un ano. Dese xeito, o valor estimado do contrato ascende a 18.840.072,35 €.

A contratación do servizo de transporte sanitario urxente terrestre na área de Vigo supón un importante incremento dos recursos da rede de transporte sanitario urxente da Fundación Pública Urxencia Sanitarias de Galicia-061 coa incorporación dunha ambulancia de soporte vital avanzado de enfermería, que se situará en Moaña, e dunha ambulancia de soporte vital básico na cidade de Vigo.

Esta licitación permitirá á Fundación Publica Urxencias Sanitarias de Galicia- 061 finalizar a renovación de todos os contratos do servizo de transporte sanitario urxente na Comunidade.

Deste xeito, a Xunta trata de axilizar a contratación deste servizo esencial para seguir a cumprir co seu compromiso coa eficacia, eficiencia e calidade desta actividade sanitaria asistencial cara á poboación galega

Actualmente, Vigo dispón de dúas ambulancias de soporte vital avanzado medicalizadas con base nas cidades de Vigo e de Mos e seis ambulancias de soporte vital básico (tres a 24 horas e tres a 14 horas).

Esta contratación modifica as horas de operatividade dos recursos de 14 a 12 horas e incrementa os recursos asistenciais cunha nova ambulancia de
soporte vital básico que pasa a estar operativa durante as 24 horas. Así, a cidade de Vigo pasa a contar con tres ambulancias de soporte vital básico e
catro de soporte vital avanzado.

Outras melloras do contrato

Así mesmo, co obxectivo de mellorar a prestación do servizo incorpóranse un vehículo de substitución de soporte vital avanzado e outro de soporte vital básico. Deste xeito, a flota de vehículos de substitución da rede de transporte sanitario urxente pasará a contar con tres vehículos de soporte
vital básico e dous de soporte vital avanzado.

A área sanitaria de Vigo conta, ademais dos recursos situados na cidade de Vigo, con dúas ambulancias de soporte vital básico durante as 24 horas,
unha con base en Moaña e outra con base en Cangas.

Todas estas melloras supoñen un importante aumento na dotación de medios humanos e materiais dos recursos de transporte que mellorarán de
forma importante a prestación do servizo. Esta nova licitación permitirá que todas as ambulancias de soporte vital avanzado dispoñan de novos recursos de electromedicina como bioanalizadores de sangue, ecógrafos, padiolas semieléctricas e monitores con capacidade de transmisión de datos, que non se contemplaban no contrato vixente e que mellorarán a capacidade de asistencia e resolución dos novos recursos asistenciais.

A Fundación Urxencias Sanitarias de Galicia-061 é o servizo de atención ás urxencias e ás emerxencias na Comunidade galega que, a través da súa
Central de Coordinación, garante a prestación de asistencia sanitaria as 24 horas, os 365 días do ano.