O estudo encargado pola Xunta cifra en 526M€ o custo da transferencia da autoestrada AP-9 a Galicia e o rescate oscila entre 1.612M€ e 2.355M€

• Estas cifras son froito dunha análise pormenorizada elaborada por unha empresa experta e independente, tras a falta de transparencia do Ministerio de Transportes
• O informe contempla dous escenarios, o primeiro a transferencia da titularidade da AP-9 á Comunidade Autónoma de acordo coa proposición de Lei que se tramita no Congreso, que suporía un custo de algo máis de 526M€
• O segundo escenario que avalía o estudo é o rescate e, en consecuencia, a gratuidade, cuxo custo se estima nunha marxe entre os 1.612 e os 2.355M€
• María M. Allegue subliñou que estes custos distan moito dos ofrecidos polo ministro Óscar Puente, que falou primeiro de 2.000M€, logo de 4.000€ e finalmente ata 6.000M€
• Remarcou que a Xunta vén defendendo desde 2009 a transferencia da AP-9, cuxa proposición de Lei foi aprobada polo Parlamento en catro ocasións e por unanimidade e o debate do traspaso foi admitido en xuño por terceira vez polo Congreso dos Deputados

O estudo encargado pola Xunta cifra en 526M€ o custo da transferencia da autoestrada AP-9 a Galicia e o rescate oscila entre 1.612M€ e 2.355M€.

A conselleira de Vivenda e Planificación de Infraestruturas, María Martínez Allegue, xunto co director da Axencia Galega de Infraestruturas, Francisco Menéndez, e o xefe de Proxectos da consultora Eptisa, Marcos Maderuelo, deu conta esta mañá nunha rolda de prensa dos resultados deste estudo.

O Goberno galego encargou no pasado mes de xuño a unha empresa experta e independente unha análise pormenorizada para determinar o custo real do traspaso da AP-9 á comunidade, unha reivindicación reiterada desde o ano 2009.

Segundo detallou a conselleira, o informe hoxe presentado contempla dous escenarios, o primeiro a transferencia da titularidade da AP-9 á Comunidade Autónoma. O cambio de titularidade en si mesmo non tería custo, pero si os incrementos de bonificacións que se prevén no texto da proposición de Lei que se tramita no Congreso, que suporían un gasto de algo máis de 526M€ adicional ás bonificacións vixentes.
O segundo escenario que avalía o estudo é o rescate e, en consecuencia, a gratuidade, cuxo custo se estima nunha oscilación entre os 1.612 e os 2.355M€.

Estes números froito do citado estudo, tal como puntualizou a conselleira, distan moito dos ofrecidos nos últimos meses polo ministro de Transportes, Óscar Puente, que falou primeiro de 2.000M€, logo de 4.000€ e finalmente ata 6.000M€.

A Xunta vén demandando transparencia ao Goberno nestas cifras e, dada a súa negativa, encargou este estudo para poder contar con información rigorosa sobre os investimentos necesarios para os citados procedementos.

María M. Allegue subliñou que a Xunta segue defendendo esta transferencia, cuxa proposición de Lei foi aprobada polo Parlamento galego ata en catro ocasións e por unanimidade.

Cómpre lembrar que o Congreso dos Deputados tamén admitiu en xuño, por terceira vez, o debate para materializar este traspaso.

A responsable de Infraestruturas fixo fincapé en que o Goberno galego continuará exixindo que se cumpran os compromisos do PSOE e do BNG, que prometeron en campaña das eleccións autonómicas a gratuidade na AP-9 e tamén na AP-53 entre Santiago e Lalín.