O goberno de Luis López impulsou en dous anos iniciativas turísticas por valor de preto de 13 millóns de euros que converteron a provincia nun destino máis internacional e desestacionalizado

Escoitar, entender e atender. Dous anos tendendo pontes

A deputada de Turismo, Nava Castro, subliñou o xiro de “360 graos na política turística” e destacou que “ademais dos 13 millóns de euros investidos en turismo ideamos unha nova estratexia, da man dos concellos, do sector e dos axentes implicados, que está xa a colleitar os seus froitos”

Castro subliñou o crecemento continuo en canto ao número de turistas estranxeiros e os galardóns que a campaña Cando volves? obtivo xa en Xapón, Sudáfrica e os Estados Unidos

“Por vez primeira a Deputación de Pontevedra ideou unha campaña centrada no interior da provincia, e tamén por vez primeira elixiu a provincia para ser o escenario da súa estrea”, remarcou a deputada

O goberno de Luis López impulsou nestes dous primeiros anos de mandato iniciativas turísticas por valor de preto de 13 millóns de euros que converteron a provincia nun destino máis sostible, máis internacional e máis desestacionalizado. A deputada de Turismo, Nava Castro, subliñou o xiro de “360 graos na política turística” e destacou que, ademais destes recursos, “ideamos unha nova estratexia da man dos concellos, do sector e dos axentes implicados que está xa a colleitar os seus froitos”. Ao respecto, Castro subliñou o crecemento continuo en canto ao número de turistas estranxeiros e os galardóns que a campaña Cando volves? obtivo nestes primeiros seis meses do ano en Xapón, Sudáfrica e os Estados Unidos.

“Un dos grandes puntos fortes destes dous anos foi conseguir impulsar unha estratexia turística nova implicando o sector público e privado, porque a nosa vontade é escoitar, entender e atender para o avance da nosa provincia”, subliñou Castro. Ao respecto da estratexia, que aposta polo turismo sostible, internacionalizado e desestacionalizado, a deputada asegurou que “xa estamos a obter interesantes resultados, cunha tendencia crecente en canto ao turismo internacional que nalgúns momentos deste ano representou xa o 44% das persoas que nos visitan”.

Outro dos puntos fortes deste mandato foi o deseño, por vez primeira na historia da Deputación de Pontevedra, dunha campaña de promoción centrada no interior da provincia. “Unha campaña premiada en Xapón, en Sudáfrica e nos Estados Unidos, e que foi moi ben acollida en Madrid, o Reino Unido, a Alemaña e o Brasil, ata onde xa a levamos”, remarcou Nava Castro, que tamén enxalzou a “recuperación das alianzas con Turismo de Galicia, porque Pontevedra non se entende sen Galicia e debemos sumar sinerxías entre administracións para conseguir que o turismo, un dos grandes motores desta terra, siga imparable”.

Investimentos en turismo

Ao longo destes dous anos de mandato de Luis López os recursos dirixidos ao turismo ascenden a preto de 13 millóns de euros. En liñas xerais, máis de 6,2 millóns van dirixidos a información e promoción turística, máis de 2,5 ao proxecto de mellora patrimonial do Castelo de Soutomaior, e máis de 1,2 millóns a impulsar a transformación do comercio en zonas turísticas. Ademais, preto dun millón de euros destinouse a promoción turística, á organización de eventos deportivos e ás oficinas de turismo, e outro medio millón á promoción do turismo accesible.

Completan os recursos dirixidos a turismo os 201.000 euros do proxecto de transformación dixital da provincia de Pontevedra como Destino Turístico Intelixente, os 288.000 euros dos Plans de Sostibilidade Turística en Deza e Tabeirós-Terra de Montes e no Condado e A Paradanta, os 174.000 euros para o fomento do turismo nos camiños ou os 143.000 euros de Turismo Terra entre Ríos, así como os preto de 20.000 euros para o proxecto Praias sen límites, experiencias turísticas atemporais para reducir a estacionalidade.