O goberno de Vigo adxudica a prolongación ata Nicaragua das ramplas da Gran Vía

Compartir
Arquivo: as ramplas de Gran Vía reciben un recoñecemento. Fonte: Concello

Caballero informou este xoves da adxudicación das obras da segunda fase das cincas mecánicas, desde Venezuela ata Nicaragua, obras que foron licitadas por 4,2 millóns de euros de orzamento.

O alcalde indicou que os traballos durarán oito meses e comezarán en xaneiro, concluída a campaña do Nadal.

 

 

A empresa gañadora do concurso público municipal foi Prace Servizos e Obras por importe de 3.645.818 euros. A Xunta de Goberno Local celebrada este xoves resolveu a adxudicación do contrato de obras, que prolongarán ata a rúa Nicaragua o modelo aplicado ao tramo comprendido entre María Berdiales e a rúa Venezuela, con humanización da Gran Vía e instalacións de cintas mecánicas cubertas no bulevar.

Abel Caballero deu conta este xoves da decisión e recordou que as obras non comezarán ata xaneiro, “para non xerar dificultades no Nadal, etapa de paseo e comercio”. As actuacións a realizar nesta segunda fase comprenden novas redes soterradas de saneamento, abastecemento e pluviais, iluminación e semáforos, beirarrúas de granito, mobiliario urbano, nova sinalización, semáforos, etc. O proxecto recolle que a Gran Vía, unha vez concluída a reforma, presentará pavimentos descontaminantes e un novo xardín botánico, tanto no interior da zona cuberta como no exterior.

Para salvar a pendente, o Concello instalará dúas novas cintas mecánicas: unha desde Venezuela ata Bolivia e a segunda, desde esta última ata á altura da rúa Nicaragua, explicou Caballero. As ramplas contarán cunha cuberta porticada de perfil metálico e acabado de vidro, e incorpora un sistema de aforro enerxético e capacidade para transportar a 7.300 persoas por hora.

Segundo manifestou Caballero en rolda de prensa, o proxecto representa “unha nova forma de mobilidade. Toda a humanización da Gran Vía se caracteriza pola modernidade, por emisións cero, por ausencias de ruído… Un novo modo de entender unha vía de comunicación nunha cidade”.

O orzamento desta segunda fase ascende aos 4,2 millóns de euros, que se engadirán aos 5,5 millóns nos que foi licitada á primeira, o tramo xa en funcionamento. O alcalde anotou que “ademais conectaremos desde a Gran Vía coa Cidade da Xustiza”, na rúa Pizarro, con outro elemento mecánico que proxecta o Concello para a rúa Bolivia.