O Multiusos das Pozas será epicentro da cultura urbana en Mos a vindeira fin de semana

A alcaldesa e a Directora Xeral de Xuventude presentaron hoxe a 5ª edición do festival DeMostra, que se celebrará o sábado 5 de outubro desde as 11.30h da mañá e ata ben entrada a madrugada, con obradoiros, competicións e música

A alcaldesa de Mos, Nidia Arévalo, a Directora Xeral de Xuventude, Lara Meneses, e a concelleira mosense de Mocidade e Participación Cidadá, Julia Loureiro, presentaron esta mañá na contorna do Multiusos das Pozas a quinta edición do festival de cultura urbana de Mos, DeMostra.

DeMostra comezou a súa andadura no ano 2018, interrompéndose nos anos 2020 e 2021 por mor da pandemia da COVID-19. Dende o seu nacemento foi unha iniciativa organizada polo Concello de Mos, contando sempre co apoio e a colaboración da Xunta de Galicia.

Durante a presentación do evento celebrada hoxe Arévalo, Meneses e Loureiro estiveron acompañadas de Pablo Castiñeira, director de Vella Escola, entidade encargada de organizar e coordinar os obradoiros que se levarán a cabo durante o festival, Dj Pitty, director da Escola de DJ de Mos e Dj que vai actuar no DeMostra; xunto con outros DJs que participarán no festival, así como algúns dos competidores das diferentes disciplinas sobre rodas que se poderán ver a vindeira fin de semana en Mos.

A quinta edición do DeMostra terá lugar o sábado 5 de outubro durante todo o día na contorna do Multiusos das Pozas. Desenvolverase desde as 11.30h da mañá ata ben avanzada a madrugada.

Nesta nova edición do festival de cultura urbana mosense haberá obradoiros, competicións e música. Os talleres serán de mural colaborativo, skate iniciación, ilustración manga, danza urbana, beatbox, freestyle football e parkour iniciación.

As competicións sobre rodas serán de skate, scooter, BMX e roller. Tamén haberá shows de Beatbox Tai e do Freestyle de Football Marcos.

Os asistentes poderán gozar de dous parques de uso libre: un parkour park e unha pista Street Football.

O fin de festa comezará dende as 21h, hora á que empezará a Holy Party e Dj Session, con 5 DJs participantes: Xian, Kevva, Pitty, Samu Pexe, e Mindset Sea.