O peirao de Bueu acolle esta fin de semana o Campionato Territorial Sur de Traineriñas

O sábado será a X Bandeira do Concello de Bueu ás 16.30 horas, e o domingo disputarase o campionato partir das 11.30 horas no peirao da vila

O peirao de Bueu acollerá esta fin de semana a X Bandeira de Traineriñas do Concello de Bueu, que se desenvolverá a partir das 16.30 horas, e o domingo, o Campionato Territorial Sur de Traineriñas ás 11.30 horas. Precisamente, este xoves tivo lugar a rolda de prensa, na que participaron Félix Juncal, alcalde de Bueu, Javier Pazos, dende a directiva do Club do Mar Bueu- Simei, e Juan Zunzunegui, da Federación Galega de Remo.

A fin de semana de remo arrancará o sábado ás 16.30 horas coa bandeira, na que participarán embarcacións de cadete feminina, cadete masculina, xuvenil feminina, xuvenil masculina, absoluta feminina e absoluta masculina. Xa o domingo pola mañá se poderá seguir o Campionato Territorial Sur de Traineriñas no que participan os clubs da provincia de Pontevedra e que servirá de clasificatoria para o Campionato Galego de Traineriñas, que se celebrará a seguinte fin de semana en Cabo da Cruz (Boiro).

Nas regatas está prevista a asistencia dunhas trinta embarcacións nas diversas categorías. Así, na cadete feminina, estará CR Chapela, CR Vila de Cangas e SD Samertolameu; en cadete masculino, CR Virxen da Guía, SD Tirán, SD Samertolameu, CR Robaleira e CR Mecos; na xuvenil feminina, SD Samertolameu, Club do Mar Bueu e CR Mecos; na xuvenil masculino, contarase con CR Chapela, CR Amegrove, Club do Mar Bueu, CDC Cesantes; na absoluta feminina, os clubs serán CR Chapela, CR Amegrove, SD Tirán, CR Robaleira, CR Mecos, e CDC Cesantes; e xa na absoluta masculina, participarán CR Chapela, SD Trán, SD Samertolameu, CR Robaleira, CR Mecos, Club do Mar Bueu, CR Amegrove, CDC Cesantes, CR Vilaxoán.

O percorrido será de 3500 metros e os longos variarán segundo as categorías, saíndo do peirao da vila e indo cara a praia de Lapamán.