O PORRIÑO PROMOVE A CONCILIACIÓN NO RURAL COA LICITACIÓN DE DÚAS NOVAS GARDERÍAS EN BUDIÑO E PONTELLAS POR MÁIS DE 1,7 MILLÓNS DE EUROS

• Budiño contará cunha nova escola infantil de deseño sostible que integrará a contorna industrial e residencial e en Pontellas rehabilitarase a súa antiga escola unitaria para albergar un moderno centro educativo, preservando o seu valor patrimonial

O Concello de Porriño lanzou a licitación para a construción de dúas novas escolas infantís nas parroquias de Budiño e Pontellas, cun orzamento base superior aos 1,7 millóns de euros. Este investimento responde ao compromiso da administración local de ampliar as prazas de educación infantil no municipio, especialmente nas áreas rurais, onde hai unha gran demanda e a conciliación é máis complicada para as familias.

A nova escola infantil de Budiño situarase nunha parcela próxima ao Polígono Industrial da Granxa, no núcleo de San Salvador de Budiño.

Este centro educativo dividirase en dúas naves: unha destinada a tres aulas e ao acceso principal, e outra para as instalacións xerais, incluíndo unha sala multiusos, un patio exterior e tres aulas adicionais. Os patios privados axardinados engadirán un ambiente seguro e saudable para o xogo ao aire libre. O deseño do edificio combinará unha estrutura prefabricada de formigón, o que lle confire un carácter industrial, que harmonizará coa súa contorna á vez que establece un espazo transicional entre a zona residencial e a industrial. Para protexer aos nenos da contorna industrial lindante, o proxecto contempla unha barreira verde composta por arboleda, creando unha separación natural entre a área de xogos e a última nave do polígono.

A parcela na que se ubicará ten total de 3.460 metros cadrados, cunha edificabilidade de 527,22 m². A súa construción requirirá un investimento de 946.000 euros.

Por outra banda, a antiga escola unitaria de Pontellas, actualmente en desuso, será rehabilitada e ampliada para converterse nun moderno centro de educación infantil que conservará a dignidade e elegancia do edificio orixinal.

A nova escola albergará cinco aulas, para o que se construirá unha ampliación moderna que respectará o estilo arquitectónico da estrutura orixinal. Dúas novas ás crecerán cara ao patio posterior, delimitando dous patios axardinados adicionais. O centro contará cunha zona de cociña e despensa con acceso independente, unha sala multiusos e oficinas.

A intervención deseñouse para poñer en valor o edificio, optimizando a súa funcionalidade sen perder a súa esencia histórica. Este proxecto ocupará unha superficie total de 427 m² e requirirá un investimento de máis de 772.000 euros.

Compromiso coa infancia e o rural

O alcalde do Porriño, Alejandro Lorenzo, destacou a importancia de ambos os proxectos xa que “ampliar o número de prazas de educación infantil responde a unha necesidade real, especialmente nas parroquias, onde moitos nenos e nenas carecen deste recurso preto das súas casas. É unha aposta polo futuro, polos nosos máis pequenos, e polo crecemento do noso rural”.

Con este investimento, Porriño non só mellorará a oferta educativa, senón que fomentará o equilibrio entre o desenvolvemento industrial e residencial, promovendo a rehabilitación de espazos históricos e a habitabilidade das zonas rurais.