O PP reivindica en Pontevedra o seu compromiso coa liberdade da mocidade galega fronte ás “imposicións” da esquerda

O Partido Popular presentouse esta tarde en Pontevedra como o garante da liberdade da mocidade galega para elixir o seu futuro “sen renuncias e sen imposicións”. Fíxoo no marco do coloquio ‘Democracia e liberdade: retos futuros para a mocidade’, organizado por Novas Xeracións e que contou coa participación de destacados cargos do partido tanto a nivel galego como estatal.

A secretaria xeral do PPdeG, Paula Prado, asegurou durante a clausura do evento que “en Galicia non dicimos ‘non’ a todo, como fan outros, senón que dicimos e sempre diremos ‘si’ ao futuro, á democracia, á liberdade e á mocidade”, en clara crítica á esquerda, á que acusou de pretender “impoñer a que universidade ir, onde vivir, en que idioma falar ou en que empresas se pode traballar”.

Prado defendeu que o Goberno galego, liderado por Alfonso Rueda, traballa para garantir oportunidades reais á xuventude, destacando medidas como o custo reducido das matrículas universitarias, as axudas para vivenda e o apoio ao plurilingüismo. Segundo a popular, estes compromisos explican que nas últimas eleccións autonómicas o 40% da mocidade galega votase ao PP.

Ademais, sinalou a situación de Pontevedra como exemplo do que cualificou de “autoritarismo” e “imposicións” por parte do “independentismo máis radical” co apoio do PSOE, fronte á aposta do PP pola democracia e a liberdade.

Pontevedra, mocidade e memoria democrática

O presidente local do PP de Pontevedra, Rafa Domínguez, puxo en valor o compromiso da mocidade pontevedresa coa “memoria democrática, a loita contra a violencia e a defensa da liberdade de pensamento”. Destacou a relevancia de manter viva a memoria das vítimas de ETA, lembrando especialmente a figura de Miguel Ángel Blanco: “Só así lograremos que as novas xeracións valoren e defendan a España libre, plural e democrática que non debemos perder”.

Marimar Blanco e a denuncia do “abandono” ás vítimas

A senadora Marimar Blanco, irmá de Miguel Ángel Blanco, protagonizou un dos discursos máis emotivos da tarde, apelando ao espírito de Ermua e lamentando que o Goberno de Pedro Sánchez “rompeu por completo a unidade política e social” construída contra o terrorismo. “Sánchez é capaz de todo por seguir en La Moncloa, incluso aceptar votos manchados de sangue”, asegurou, en referencia aos apoios parlamentarios do executivo.

Blanco defendeu que o PP sempre puxo “a memoria, a dignidade e a xustiza das vítimas” por riba do interese político, e fixo un chamamento á mocidade para que coñeza o custo en “sangue, dor e sufrimento” que supuxo a conquista das liberdades das que goza hoxe España.

O acto contou tamén coa participación das senadoras Pepa Pardo e Marimar Blanco, o eurodeputado Adrián Vázquez, as presidentas de Novas Xeracións en Galicia e Pontevedra, Nicole Grueira e Ana Cristina Pérez, a secretaria xeral provincial, Luisa Piñeiro, e o concelleiro e presidente local de Novas Xeracións, Guille Juncal.