O PPdeG enxalza a Telmo Martín e Sanxenxo como exemplo de estabilidade e proxectos a longo prazo

O Partido Popular de Galicia (PPdeG) celebrou hoxe a súa cea de Nadal no Hotel Carlos I Silgar, un evento que reuniu máis de 300 asistentes e onde destacaron a xestión de Telmo Martín como alcalde de Sanxenxo, poñendo o foco na «estabilidade» dos gobernos populares e na importancia de proxectos sostidos no tempo.

Durante o evento, o presidente do PPdeG, Alfonso Rueda, e a secretaria xeral do partido, Paula Prado, agradeceron a contribución de Sanxenxo aos éxitos acadados nas últimas eleccións autonómicas, onde o partido recibiu case o 55% dos votos. Ademais, destacaron os resultados similares obtidos nas eleccións europeas de xuño, salientando a representación da deputada María Deza como un reflexo do apoio que o municipio brinda ao proxecto popular.

O modelo do PPdeG, un exemplo para Galicia

O conselleiro de Educación, Román Rodríguez, subliñou o traballo realizado polo equipo liderado por Telmo Martín, definíndoo como «un proxecto con visión de futuro» que entende as necesidades da cidadanía e encamiña iniciativas de progreso e benestar. Segundo Rodríguez, Sanxenxo é un referente na comarca do Salnés e no municipalismo galego pola súa capacidade para mellorar a calidade de vida dos veciños.

“Sanxenxo demostra que o modelo do PPdeG funciona e é o mellor para o futuro deste concello”, asegurou o conselleiro, quen destacou a capacidade de Telmo Martín para aglutinar esforzos e liderar proxectos que beneficien á comunidade.

Telmo Martín: “Humildade e traballo son a clave do noso éxito”

Telmo Martín, alcalde de Sanxenxo e presidente local do PP, agradeceu a presenza de afiliados e veciños na cea, desexándolles un 2025 cargado de saúde e novos logros. Martín lembrou que o PP conseguiu nas últimas eleccións municipais unha ampla maioría do 56% e fixo un chamamento á unidade e ao esforzo colectivo para manter a confianza da cidadanía.

“Se queremos seguir mantendo ese apoio dos veciños, só hai unha fórmula: humildade, traballo e máis traballo. Non o esquezades nunca”, subliñou o alcalde. Ademais, recoñeceu o sacrificio e a dedicación dos concelleiros do goberno local, afirmando que «mentres sigamos xuntos e a nosa prioridade sexa o interese xeral, nada será imposible para Sanxenxo”.