Regades advírtelle aos “falcóns do PP” que o Partido Socialista non vai tolerar a “vandalización” da Deputación para volver ao reparto de fondos a dedo

O secretario xeral provincial, David Regades, acompañado de deputados e deputadas provinciais socialistas compareceu nas escalinatas do Pazo Provincial para advertir de que “o modelo de financiamento regrado chegou hai 8 anos para quedarse” e que haberá pelexa nas instancias administrativas e mesmo xudiciais se o Partido Popular consuma a volta ao modelo caciquil, é dicir ao reparto a dedo en función da cor política dos concellos e á libre disposición presidencial.

O sucedido no último Pleno, no que o PP rexeitou unha moción para o mantemento nos Orzamentos provinciais de 2024 do modelo de

financiamento igualitario acendeu tódalas alertas. David Regades recordoulle ao PP que os 19 alcaldes e alcaldesas socialistas, que gobernan a medio millón de persoas das 950.000 que viven na nosa provincia, observan con “gran preocupación” a indefinición de non saber con que fondos da Deputación van contar o ano próximo. “O Plan Concellos é un patrimonio desta provincia”, recalcou. O secretario provincial socialista instou ao presidente provincial, Luís López, a “perder o medo” a convocar aos alcaldes e alcaldesas a unha posta en común “para poñer as cartas boca arriba”. Tras recordar que Carmela Silva reuniuse coas Alcaldías en só 12 días, lamentou que o seu sucesor pretenda celebrar xuntanzas individuais: “celebrou tres en tres meses; a este ritmo non lle van chegar nin dous mandatos porque o certo é que tampouco responde ás peticións individuais que está a recibir”. En todo caso, destacou que á luz dos acontecementos, esas xuntanzas institucionais individuais “non valen para nada”. “Fai falta un pacto de provincia e iso faise cun cumio entre o presidente da Deputación e os 61 alcaldes e alcaldesas”.