O Partido Socialista asumiu durante a pasada campaña electoral a petición do colectivo de mariscadoras da provincia de Pontevedra de poder percibir as axudas económicas por cese de actividade (pensadas para os períodos de toxina) mentres realizan labores de limpeza, resementado ou rareo nos bancos marisqueiros. Fíxoo durante unha xuntanza do secretario xeral provincial e voceiro da Comisión de Agricultura e Pesca no Congreso, David Regades, con Raquel Gómez, presidenta da Agrupación de Marisqueo a Pé da Confraría San Telmo. Agora este dereito vén de ser recoñecido pola Dirección Xeral do Instituto Social da Mariña e comunicado ás direccións provinciais do ISM.
“Está claro que só cando o PSOE goberna as persoas que máis o necesitan ven ampliados os seus dereitos e isto abrangue tamén, por suposto, á xente do mar, pois en moi pouco tempo temos mellorado os coeficientes de xubilación das redeiras e agora as condicións de traballo das mariscadoras galegas, unha medida que afecta a 6.000 persoas”, afirmou Regades.
O deputado explicou que a necesidade desta modificación agudizouse a raíz dos últimos episodios de baixa salinidade, nas que foi necesario retirar marisco morto dos areais e redistribuír os exemplares inmaduros que lograron sobrevivir. “Era unha petición razoable e o Goberno de España soubo escoitala, mentres a Xunta dedicouse a botar balóns fóra e só accedeu a repartir unhas axudas completamente insuficientes dun xeito espurio, pois transformouno nunha medida electoralista de última hora”.
“A Xunta”, recordou Regades, “mesmo atreveuse a descualificar ao PSOE por propoñer que se declarase a emerxencia de interese galego, competencia exclusiva do Goberno autonómico, para asignar as axudas que realmente necesitaba o sector; preferiu argallar unha pequena esmola electoralista”.
“Hai agora quen intenta que isto pase por unha decisión tecnocrática, pero trátase dunha decisión política, porque non tería sido posible se o ministro de Agricultura e Pesca non fose Luis Planas e se o presidente do Goberno non fose Pedro Sánchez; non se tería conseguido de non gobernar o Partido Socialista, pois a petición acentuouse este outono,
pero era histórica”, recalcou David Regades.
Significou, ademais, que é un avance con clarísima perspectiva de xénero pois o colectivo que marisquea nas rías galegas está integrado por 2.700 mulleres e uns 900 homes.
O deputado concluíu que o cambio climático chegou para quedarse e estes invernos irregulares con altas temperaturas e precipitacións moi concentradas vanse repetir, polo que este cambio normativo era necesario.