O club de lectura “Marcapasos” comeza unha nova andaina no mes de outobro

A participación é de balde previa inscrición na Biblioteca. Ofértanse 14 prazas que se cubrirán por orde de presentación da solicitude.

O prazo para anotarse vai do 1 ao 9 de outubro.

A Biblioteca Municipal Rosalía de Castro en colaboración co profesor Augusto Guedes pon en marcha en outubro unha nova edición do Club de Lectura Marcapasos. Para este novo curso formarase un grupo de 14 persoas que se reunirán quincenalmente no Auditorio para conversar, debater e intercambiar impresións sobre a obra literaria que estean lendo nese momento. O formulario pode collerse na Biblioteca en horario (de 9 a 14, e de 16 a 21 horas), e debe entregarse alí mesmo. As prazas cubriranse por rigorosa orde de inscrición.

O Club de Lectura “Marcapasos” é unha iniciativa promovida pola Biblioteca e varios amantes da lectura. A proposta pretende potenciar e fomentar o pracer da lectura, animar a coñecer a novos autores e propiciar a tolerancia cara ideas e opinións contrarios aos nosos a través do debate sobre as obras abordadas. A Biblioteca proporcionará aos integrantes do club os títulos que lerán nas súas casas e sobre os que traballarán posteriormente nas reunións grupais dirixidas polo coordinador e que se desenvolverán no Auditorio Municipal.

Con esta proposta amplíase e a oferta da Biblioteca Municipal dando cobertura a un sector da poboación, que xa é lector habitual, pero que quere ir máis aló, que quere afondar nas obras literarias, comentalas e compartir e intercambiar opinións con outros lectores, saber algo máis dos autores ou do contexto no que se escribiron ou desenvolven os textos. Ademais, o club da un novo enfoque á lectura, que pasa de ser un acto íntimo e persoal que se soe facer de xeito individual, a converterse nunha experiencia colectiva e compartida que resulta moito máis enriquecedora ao confrontar opinións, ideas e permitir o debate.