19 septiembre, 2024
O CONCELLO DE NIGRÁN TRANSFÓRMASE ESTA FIN DE SEMANA NA CAPITAL DA PETANCA A NIVEL NACIONAL
Praia América acolle simultáneamente o ‘I Open Nacional Xuvenil de Petanca’ e o ‘II Open Internacional Conchi’, con máis de cen xogadores chegados de toda España
“É unha gran oportunidade tamén para por en valor o noso municipio no exterior e dalo a coñecer, por iso consideramos Praia América como o mellor escenario”, sinala o alcalde, Juan González
“Queremos que a mocidade da comarca poida comprobar de primeira man que a petanca non é un deporte exclusivo da terceira idade e motivalos para poder formar canteira no noso clube”, destaca ‘Melucha’ Valverde, do C.C.D Bolos da Carrasca.
O Concello de Nigrán volverá a ser esta fin de semana o epicentro da petanca a nivel nacional con dous torneos de dupletas disputándose á vez en Praia América: o ‘I Open Nacional Xuvenil de Petanca’ e o ‘II Open Internacional Conchi’. Ambas competicións, organizados polo Concello de Nigrán e o C.C.D. Bolos da Carrasca coa colaboración da Xunta e Deputación, reunirán a máis de 100 xogadores chegados de todo o país. Por unha banda, unha trintena de mozos e mozas de 6 a 17 anos desputarán o torneo xuvenil e, por outro, 80 mulleres de todas as idades xogarán o open ‘Conchi’, memorial en homenaxe a Conchi Nande Otero, veciña de Parada falecida e quen foi xogadora destacada do club Bolos da Carrasca.
“Esta cita é posible unha vez máis grazas ao C.C.D. Bolos da Carrasca da parroquia nigranesa de Parada, os grandes promotores da petanca en toda a comarca. Grazas ao seu tesón e esforzo, Nigrán volve a ser capital deste deporte, sendo unha gran oportunidade tamén para por en valor o noso municipio no exterior e dalo a coñecer, por iso consideramos Praia América como o mellor escenario”, destaca o alcalde, Juan González, facendo referencia tamén ao Campeonato de España de Tripletas Sénior 1ª Masculino que tivo lugar no 2021. Por iso, novamente, o Concello de Nigrán habilitará o aparcadoiro da antiga escola de vela de Praia América con preto de 30 canchas de competición e adestramento. O venres será a presentación dos equipos e os sorteos e, durante todo o sábado e domingo, terán lugar sendas competicións. No lugar habilitarase unha cantina.
“Queremos que a mocidade da comarca poida comprobar de primeira man que a petanca non é un deporte exclusivo da terceira idade e motivalos para poder formar canteira no noso clube”, destaca Melucha Valverde, seleccionadora galega e integrante do C.C.D. Bolos da Carrasca, quen se mostra especialmente orgullosa de atraer a Nigrán a dous rapaces de 6 e 7 anos do Club Muleño e Club Santomera, ambos de Murcia. “Miralos xogar é un espectáculo”, asegura sobre este torneo xuvenil mixto e con idades tan dispares (dos 6 aos 17 anos). En concreto, recibirán a mocidade de Cantabria, Murcia, Castela e León, Aragón e Galicia, non sendo ninguén do Club Bolos da Carrasca. “Desgraciadamente non temos xogadores de categoría xuvenil e o que nos gustaría é, precisamente, captar interesados”, indica.
Ademáis da mocidade, as mulleres serán as protagonistas exclusivas do ‘II Open Internacional Conchi’ que, por segundo ano consecutivo, rende homenaxe a Conchi Nande Otero. Un total de 80 xogadoras de todas as idades e de 40 equipos de Galicia, Murcia, Cantabria, País Vasco e Valencia, competirán por premios en metálico desde 800 €. “É un dos poucos torneos que quedan exclusivamente femininos, e estamos moi orgullosos de organizalo baixo o nome de Conchi, a nosa querida xogadora”, engade Melucha.
Alerta